საქართველოს ეკონომიკის სამინისტროში აცხადებენ, რომ დღეს სამი არასამთავრობო ორგანიზაციის, მწვანე ალტერნატივის, საიასა და სოციალური სამართლიანობის ცენტრის განცხადება ნამახვანის ჰესის მშენებლობასთან დაკავშირებულ საკითხებზე სინამდვილეს არ შეესაბამება.

"დღეს სამი არასამთავრობო ორგანიზაციის მხრიდან გამოთქმული ბრალდებები, თითქოს ჩვენ არ ვართ დიალოგის მომხრე, არ შეესაბამება სინამდვილეს. ამავე დროს, აღნიშნავთ, რომ ჩვენთვის მიუღებელია დიალოგის იმ ფორმატში წარმართვა, როდესაც პროცესის მონაწილე ერთი მხარე საჯარო სივრცეში ავრცელებს მეორის წინააღმდეგ უსაფუძვლო და დაუსაბუთებელ ბრალდებებს, რომლებიც აპრიორი გამიზნულია ფართო საზოგადოების შეცდომაში შეყვანასა და ნამახვანი ჰესის მშენებლობის ადგილზე ვითარების დაძაბვისკენ", — აცხადებენ სამინისტროში.

სამინისტროში აცხადებენ, რომ ისინი მზად არიან საკითხთან დაკავშირებით დისკუსიის გამართვისთვის და მოუწოდებს არასამთავრობო ორგანიზაციებს, "დათანხმდნენ დისკუსიის ფორმატს".

"სხვადასხვა საკითხების პოლიტიკურ ჭრილში და ტემპერატურის ხელოვნურად მომატების ნაცვლად, ცხადია, მივესალმებით ნებისმიერ საგნობრივ დისკუსიას და განსხვავებულ აზრს. სამინისტრო აღნიშნულ არასამთავრობო ორგანიზაციებს მოუწოდებს, დათანხმდნენ დისკუსიის ფორმატს და მხოლოდ ასეთ ფორმატში მოხდეს მათ მიერ დაყენებული საკითხების განხილვა, უნდა შემუშავდეს სადისკუსიო საკითხების კონკრეტული დღის წესრიგი, პროცესში ჩაერთონ კომპეტენტური ექსპერტები და დაინტერესებული მხარეები", — აცხადებენ სამინისტროში.

მათივე განცხადებით, მათი სურვილია, "ერთხელ და სამუდამოდ წერტილი დაესვას სპეკულაციებს" როგორც კონკრეტულად ნამახვანი ჰესის პროექტთან, ასევე ზოგადად საქართველოს ენერგოუსაფრთხოების გასამყარებლად მიმართულ გადაწყვეტილებებთან დაკავშირებით.

დღეს სოციალური სამართლიანობის ცენტრმა (ყოფილი EMC), საქართველოს ახალგაზრდა იურისტთა ასოციაციამ (საია) და მწვანე ალტერნატივამ განაცხადეს, რომ ნამახვანის ჰესის მშენებლობასთან დაკავშირებული კითხვებზე პასუხების ნაცვლად, სახეზეა ცილისწამების კამპანია.

მათი თქმით, ამ "უფლებაშემლახავ პრაქტიკას" ბოლო პერიოდში თან ახლავს დეზინფორმაციული და მადისკრედიტირებელი შეტევები აქტივისტების, საზოგადოებრივი ორგანიზაციებისა და მეცნიერების წინააღმდეგ, რომლებიც ეწინააღმდეგებიან ნამახვანჰესის პროექტის ამ ფორმით განხორციელებას.