ერთ დღეში ინდოეთში კორონავირუსის 103 558 ახალი შემთხვევა დაფიქსირდა, რაც დღიური მაჩვენებლისთვის რეკორდულია. ჯამში ინდოეთში 12,59 მილიონი შემთხვევაა გამოვლენილი.

ამასთან, ბოლო 24 საათში ქვეყანაში კორონავირუსისგან 478 ადამიანი დაიღუპა, რითაც გარდაცვალების ჯამური მაჩვენებელი 165 101-მდე გაიზარდა.

დაავადებულთა მაჩვენებლით აშშ-სა და ბრაზილიის შემდეგ ინდოეთი მესამე ქვეყანაა.

ინდოეთის ყველაზე მდიდარ შტატში, მაჰარაშტრაში, სადაც მუმბაი მდებარეობს და 110 მილიონი ადამიანი ცხოვრობს, შაბათ-კვირას ლოქდაუნი იმოქმედებს, ხოლო აპრილის ბოლომდე კომენდანტის საათია დაწესებული. გარდა ამისა, იზღუდება ოთხზე მეტი ადამიანის შეკრება, ხოლო სანაპიროები, აუზები, ბარ-რესტორნები, კინოთეატრები და კერძო ოფისები დაიკეტება.

მუმბაიში ბოლივუდის ფილმების გადაღება მხოლოდ ნორმების დაცვის შემთხვევაში იქნება შესაძლებელი.