საქართველოს იუსტიციის უმაღლესი საბჭო სასამართლო სისტემისა და მოსამართლე ნინო ჩახნაშვილის მიმართ გამოთქმულ კრიტიკას შეურაცხმყოფელ, დაუსაბუთებელსა და ცრუ ბრალდებებს უწოდებს. საბჭოში აცხადებენ, რომ "მსგავსი უსაფუძვლო განცხადებებო 2019 წლის 20 ივნისის ჯგუფური ძალადობის ხელმძღვანელობისა და მასში მონაწილეობისათვის სისხლის სამართლის საქმეზე ბრალდებულ ნიკანორ მელიასათვის აღკვეთის ღონისძიების — გირაოს პატიმრობით შეცვლის თაობაზე მიღებულ გადაწყვეტილებას უკავშირდება".

"ამ დღეებში სასამართლოსა და საქმის განმხილველი მოსამართლის მიმართ განხორციელებული ცილისმწამებლური კამპანია გასცდა სიტყვისა და გამოხატვის თავისუფლების პრინციპებს, ცრუ ბრალდებებსა და პირად შეურაცხყოფაში გადაიზარდა.

გვსურს საზოგადებას განვუმარტოთ, რომ მოცემულ სისხლის სამართლის საქმეზე ბრალდებულმა ნიკანორ მელიამ დაარღვია აღკვეთის ღონისძიების სახით გამოყენებული გირაოს პირობები. მისთვის ცნობილი იყო ის სამართლებრივი შედეგები, რაც ახლავს გირაოს პირობების დარღვევას. მან გაცნობიერებულად და მიზანმიმართულად აარიდა თავი კანონით დაკისრებული ვალდებულებების შესრულებას, რის თაობაზეც არაერთხელ საჯაროდ განაცხადა", — წერია საბჭოს მიერ გავრცელებულ განცხადებაში.

იუსტიციის უმაღლეს საბჭოში აღნიშნავენ, რომ საქართველოს მოქმედი კანონმდებლობის თანახმად, გირაოს პირობების მიზანმიმართულად/გაცნობიერებულად დარღვევა და კანონის მოთხოვნების აშკარა უგულებელყოფა ერთმნიშვნელოვნად არის აღკვეთის ღონისძიების — გირაოს პატიმრობით შეცვლის საფუძველი. სისხლის სამართლის საპროცესო კოდექსი ბრალდებულის მიერ გირაოს პირობების ამგვარი დარღვევის შემთხვევაში კი, სხვა ალტერნატიული გადაწყვეტილების მიღების შესაძლებლობას არ იძლევა.

იუსტიციის უმაღლესი საბჭო მოუწოდებს ყველას, სასამართლოს პოლიტიზირებისა და დისკრედიტაციის მცდელობისგან თავი შეიკავონ.

"სასამართლო არ დაუშვებს შერჩევითი მართლმსაჯულების განხორციელებას და გარკვეული ჯგუფების დაუსაბუთებელი ბრალდებების თავიდან აცილების მიზნით კანონის მოთხოვნათა უგულებელყოფას", — ვკითხულობთ იუსტიციის საბჭოს განცხადებაში.

მოსამართლე, ნინო ჩახნაშვილი კრიტიკის ობიექტი მას შემდეგ გახდა, რაც მან ნაციონალური მოძრაობის თავმჯდომარის, ნიკა მელიას საქმეზე სასამართლოს გადაწყვეტილება გამოაცხადა.

ნიკა მელიას პატიმრობა 18 თებერვალს შეუფარდეს.