პრემიერმინისტრის, გიორგი გახარიას განცხადებით, ვაჭრობის გახსნის შემდეგ, იმ შემთხვევაში, თუ ეპიდემიოლოგიური მდგომარეობა მისცემს შესაძლებლობას და ინფიცირების მაჩვენებელი 4%-ს ჩამოსცილდება, დაწყებითი განათლების დაწესებულებები გაიხსნება.

"მოგეხსენებათ, რომ ჩვენ 1 თებერვლიდან მთლიანად ქვეყნის მასშტაბით ვაჭრობას სრულად ვხსნით. შემდგომი ყველაზე მნიშვნელოვანი ნაბიჯი, რომელიც საქართველოს მთავრობას მოუწევს გადადგას, ეს არის, რა თქმა უნდა, განათლების და პირველ რიგში, დაწყებითი განათლების დაწესებულებების გახსნა. ჩვენ ძალიან კარგად გვესმის, რას ნიშნავს სკოლის მოსწავლეების და მათი მშობლებისთვის ხანგრძლივი პერიოდით სახლში ყოფნა და ის, რომ მათ არ აქვთ შესაძლებლობა ფიზიკურად იყვნენ სასწავლო კლასებში. როგორც კი ეპიდემიოლოგიური მდგომარეობა მოგვცემს შესაძლებლობას და როგორც კი მაჩვენებელი ჩამოსცილდება 4%-ს, რა თქმა უნდა, ჩვენ ყველაფერს გავაკეთებთ იმისთვის, რომ ავამოქმედოთ ეს უკიდურესად მნიშვნელოვანი სფერო ცხოვრების, განსაკუთრებით ჩვენი შვილებისთვის", — განაცხადა პრემიერმინისტრმა.

განათლების მინისტრმა, მიხეილ ჩხენკელმა, ასევე, განაცხადა, რომ სკოლების გახსნა თბილისში, რუსთავსა და ქუთაისში დამოკიდებულია ეპიდსიტუაციაზე და იმ კონკრეტულ კრიტერიუმზე, რომელიც მოიაზრებს 7 დღის განმავლობაში ინფიცირების 4%-მდე შემცირებას.

თბილისის, რუსთავისა და ქუთაისი გარდა საქართველოს მასშტაბით სკოლების გახსნა 1 თებერვლიდან იგეგმება, აღნიშნულ ქალაქებში კი მთავრობამ სკოლების გახსნა 1 მარტამდე გადადო.

ჯანდაცვის მინისტრის, ეკატერინე ტიკარაძის განცხადებით, განათლებისა და ინფრასტრუქტურის სამინიტრომ სასწავლო დაწესებულებების პირობების გაუმჯობესებაზე იმუშავეს. მისივე თქმით, აუდიტი განმეორებითაც ჩატარდა და დარწმუნებულია, რომ შემდგომი ვიზირებისა და შემოწმების შემდეგ იქ ყველა ის დამაკმაყოფილებელი საჭიროება იქნება, რომელიც ბავშვებისთვის უსაფრთხოებას უზრუნველყოფს.