ევროპული საქართველოს ერთ-ერთი ლიდერი, გიორგი კანდელაკი აცხადებს, რომ ირაკლი ჩავლეიშვილისთვის ნაგვის დაყრას არც მორალურად და არც პრაგმატულად გამართლება არ აქვს.

"მიუხედავად იმისა, რომ ამ აქტს ადგილი ჰქონდა უსამართლობის მსხვერპლთა მხრიდან, მას გამართლება არც მორალურად და არც პრაგმატულად არ აქვს. მორალურადაც და პრაგმატულადაც, ყოველთვის ბევრად უფრო დიდი შედეგის მომტანია და გამართლებულია მხოლოდ არაძალადობრივი, მტკიცე, შეუპოვარი პროტესტი", — განაცხადა გიორგი კანდელაკმა.

გუშინ, 23 იანვარს, ირაკლი ჩავლეიშვილს, რომელიც აჭარის უმაღლეს საბჭოში ოპოზიციის სიით შევიდა, მოქალაქეებმა ქუჩაში ნაგავი დააყარეს. ამის ამსახველი ვიდეო ორგანიზაცია ალტერნატივამ გაავრცელა. როგორც ალტერნატივის მიერ გავრცელებულ ვიდეოკადრებში ჩანს, მოქალაქეები ჩავლეიშვილს ქუჩაში შეხვდნენ. ისინი "მონა, მოღალატეს" სკანდირებდნენ და ეუბნებოდნენ, რომ საბჭოში გაყალბებული მანდატით შევიდა.

დღეს ცნობილი გახდა, რომ საქმეზე შსს-მ გამოძიება დევნისა და ხულიგნობის მუხლებით დაიწყო. მალევე, ალტერნატივას წარმომადგენელი, ირაკლი ფანგანი დააკავეს.

მას ბრალდება საქართველოს სისხლის სამართლის კოდექსის 156-ე მუხლის მეორე ნაწილის "ა" ქვეპუნქტით (პოლიტიკურ მოღვაწეობასთან დაკავშირებით ძალადობით დევნა) წარედგინა, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.

დეკემბერში ირაკლი ჩავლეიშვილმა რესპუბლიკური პარტია დატოვა და საბჭოში შესვლა გადაწყვიტა. პარტიის დატოვების მიზეზად მან ბოიკოტთან დაკავშირებით განსხვავებულ პოზიციებს ასახელებს.

ამავე თემაზე: