STOP COVID აპლიკაცია, რომლის საფასურმაც 412 116 ლარი შეადგინა, გაუქმდა. ამის შესახებ ინფორმაცია On.ge-ს ჯანდაცვის სამინისტროში დაუდასტურეს.

"აპლიკაცია STOP COVID-ის სარგებლობის ვადა დასრულდა 2021 წლის 20 იანვარს და მოხდა მისი დეაქტივაცია, ეპიდსიტუაციიდან გამომდინარე მიიღო სამინისტრომ ეს გადაწყვეტილება. სამინისტრომ ვეღარ დაინახა საჭიროება და აღარ არის დროებით ეს STOP COVID-ის აპლიკაცია", — განაცხადეს უწყებაში.

ჯანდაცვის სამინისტროს ინფორმაციით, აპლიკაცია ავსტრიულმა კომპანიამ შეიმუშავა და ლიცენზიის საფასურის გადახდის გარეშე, სხვადასხვა ქვეყნის მთავრობისთვის ხელმისაწვდომი გახადა. ამის შემდეგ აპლიკაცია ქართულ რეალობასთან და კანონმდებლობასთან შესაბამისობაში მოიყვანეს. უწყებაში აღნიშნავენ, რომ ტექნიკური მომსახურების საფასურმა 412 116 ლარი შეადგინა, რომელიც მსოფლიო ბანკის, კორონავირუსზე გადაუდებელი რეაგირების პროექტის ფარგლებში რეტროაქტიულად ფინანსდება.

2020 წლის დეკემბრის მონაცემებით, აპლიკაცია 400 ათასამდე მომხმარებელს ჰქონდა ჩამოტვირთული. ამის შესახებ On.ge-ს ჯანდაცვის მინისტრის მოადგილე, თამარ გაბუნია ესაუbრა.