ევროპული საქართველოს ყოფილმა წევრმა და სამოქალაქო აქტივისტმა, ელენე ხოშტარიამ თელავის პროკურატურასთან აქცია გამართა, თუმცა, პროკურატურის კარი მას დაკეტილი დახვდა და სამართალდამცველებმა შენობაში შესვლის უფლება არ მისცეს. იგი პროკურორთან შეხვედრას და 1 იანვარს, თელავის პოლიციასთან გაშლილ კარავზე თავდასხმის საქმის გამოძიებას ითხოვს.

"კარი დაკეტეს, როგორც კი დაინახეს, რომ მინდოდა შესვლა. არც ერთი ადამიანი, დაზარალებულისა და ჩემ გარდა აქ არ შევა. არავინ არ აპირებს შევარდნას. ეს არის მოთხოვნა, რომ მე და დაზარალებული შევხვდეთ პროკურორს და მოვთხოვოთ პასუხი. როდესაც მოქალაქეს თავს ესხმიან და სიცოცხლის საფრთხეს შეიცავს ეს თავდასხმა, რატომ არ იძიებენ ამ საქმეს? ეს არის კითხვა და ეს არ არის პოლიტიკური საკითხი. ყველა მოქალაქე არის საფრთხის ქვეშ, როდესაც ძალადობის უფლებას არიგებენ პოლიტიკური ნიშნით", — განაცხადა ელენე ხოშტარიამ ფორმულას საუბარში.

თელავის პროკურატურის შენობასთან აქციის გამართვა ელენე ხოშტარიამ 17 იანვარს დაანონსა. აქტივისტების განცხადებით, 1 იანვარს თელავის თეატრის წინ მდებარე კარავში ორი პირი ავტომანქანით შეღწევას შეეცადა, რა დროსაც კარავი დაზიანდა, მათ სიცოცხლეს კი საფრთხე შეექმნა.

გაიგეთ მეტი: