მოქალაქის თქმით, მიუხედავად იმისა, ის უსახლკაროა, პოლიციამ კომენდანტის საათის დროს გარეთ ყოფნის გამო 2 000 ლარით დააჯარიმა. აღნიშნული ინფორმაცია გირჩი TV-ის ჟურნალისტმა, ნინა საჯაიამ საკუთარ ფეისბუქ ლაივში გაავრცელა.

საჯაიას ლაივში ჩანს პირი, რომელიც აცხადებს, რომ მას სახლ-კარი არ გააჩნია. მისი თქმით, გუშინ უკვე დააჯარიმეს და დღესაც აპირებენ მის დაჯარიმებას.

"ყველაფერი დამიკარგია, რაღა ვუყო [...] აგერ, დღესაც დამაჯარიმეს. რა ვუყოთ, ძმებო?! რა ვუყოთ ძმებო?! [...] არამართალია ეს. არაადამიანური არ არის [...] არც სახლი მაქვს, არც კარი. მერიაში შევედი და არ დამეხმარნენ, ძმებო, რა ვუყო?!", — აცხადებს იგი.

პოლიციელის თქმით, ისინი არკვევენ აღნიშნული პიროვნება ნამდვილად უსახლკაროა თუ არა.

საქართველოში კორონავირუსის პრევენციის მიზნით დაწესებული რეგულაციების თანახმად, 21:00 საათის შემდეგ გარეთ გადადგილება იკრძალება. იზოლაციისა და კარანტინის წესის დარღვევა იწვევს ადმინისტრაციულ სამართალდარღვევათა კოდექსის 42(10)-ე მუხლის შესაბამისად ფიზიკური პირის დაჯარიმებას 2 000 ლარით, ხოლო იურიდიული პირის — 10 000 ლარის ოდენობით.