კომუნიკაციების კომისიის ხელმძღვანელი, კახა ბექაური აცხადებს, რომ გამოხატვის თავისუფლება, მათ შორის ინფორმაციის მიღების და არჩევანის თავისუფლებაც შეიძლება შეიზღუდოს უხამსობის ტირაჟირების მიზეზით.

"მედიაში ეთიკური სტანდარტების დაცვა ძალიან მნიშვნელოვანია გამოხატვის თავისუფლებისთვის, უხამსობის ტირაჟირებით გამოხატვის თავისუფლება შეიძლება შეიზღუდოს, კერძოდ, სხვა ადამიანების ძირითადი უფლებები, მათ შორის ინფორმაციის მიღების და არჩევანის თავისუფლება. უხამსობისაგან სამაუწყებლო ეთერის დაცვა, გამოხატვის თავისუფლებას კი არ ზღუდავს, არამედ გამოხატვის თავისუფლება უფრო მაღალ სტანდარტზე აჰყავს", — განაცხადა ბექაურმა.

ეს განცხადება მან კომუნიკაციების კომისიის სხდომაზე, მთავარ არხზე გასული სიუჟეტის განხილვისას გააკეთა. საქმე ეხება კადრს, სადაც ჩანს, რომ ფინანსთა მინისტრი, ივანე მაჭავარიანი, პარლამენტში ყოფნისას, სავარაუდოდ, სასქესო ორგანოს იფხანს. კომისია ამ კადრს "არაეთიკური კონოტაციით წარმოჩენილ გრაფიკულ გამოსახულებას" უწოდებს.

გამოხატვის თავისუფლების შეზღუდვის არგუმენტად ბექაური ასახელებს სიტუაციას, როცა შეიძლება ადამიანმა საჯაროდ აზრის გამოთქმისგან თავი შეიკავოს შესაძლო შეურაცხყოფის შიშით. თუმცა, დასძენს, რომ საუბარია ჩვეულებრივ მოქალაქეებზე და არა პოლიტიკოსებზე, რომელთაც თმენის ვალდებულება აქვთ.

"ადამიანებს, როდესაც განსხვავებული მოსაზრებების გამო შეურაცხყოფას აყენებენ დიდი აუდიტორიის წინაშე, ამით მკვიდრდება მანკიერი პრაქტიკა, ნებისმიერ მოქალაქეს შეიძლება საკუთარი პოზიციის საჯაროდ გამოთქმის სურვილი ჰქონდეს და ის ამას მოერიდოს, იმის გამო, რომ შესაძლოა მას შეურაცხყოფა მიაყენონ, რითიც მისი უფლებები შეიძლება შეილახოს. მე ვსაუბრობ ჩვეულებრივ მოქალაქეზე და არა პოლიტიკოსებზე და საჯარო მოხელეებზე რომლებსაც თმენის ვალდებულება აქვთ და ამ თვალსაზრისით მაღალი სტანდარტი არსებობს და ასეც უნდა იყოს", — განაცხადა ბექაურმა.

მისი თქმით, კომუნიკაციების კომისიამ მაუწყებლების აქტიური მონიტორინგი იმიტომ დაიწყო, რომ "უხამსობის რაოდენობა მკვეთრადაა გაზრდილი". ბექაური მოუწოდებს მაუწყებლებს, ასეთი შინაარსის შემცველი გადაცემების გავრცელებას მოერიდონ.

დღეს, მარეგულირებელმა კომისიამ განიხილა მთავარი არხისთვის ადმინისტრაციული პასუხისმგებლობის დაკისრების საკითხი იმ სიუჟეტის გამო, რომლის ერთ ნაწილში, კადრი მიახლოებულია ფინანსთა მინისტრის, ივანე მაჭავარიანის გენიტალიებზე. მთავარი არხის იურისტი, თამთა მურადაშვილი On.ge-სთან ამბობს, რომ სამართლებრივად, კომუნიკაციების კომისიას არ აქვს უფლება ამ კონკრეტული მუხლების დარღვევა განიხილოს. იგი ფიქრობს, რომ კომუნიკაციების კომისიის მიერ ამ საკითხს განხილვა, არის მთავარი არხის კონტროლისა და მისთვის პრობლემების შექმნის მცდელობაა.

გადაწყვეტილებას იმის შესახებ, იყო თუ არა აღნიშნული შემთხვევა უხამსობის ტირაჟირება, კომუნიკაციების კომისია ერთ კვირაში მიიღებს.