პარლამენტის თავმჯდომარე, არჩილ თალაკვაძე აცხადებს, რომ სტრასბურგის სასამართლოს გადაწყვეტილებამ, განამტკიცა სამართლიანობის აღდგენის რწმენა.

"2008 წლის რუსული ოკუპაციის შედეგად, ჩვენმა თანამოქალაქეებმა დაკარგეს საცხოვრისი (სადაც დღეს რუსული სამხედრო ინფრასტრუქტურაა განლაგებული), მამაპაპისეული კერა და იქ გატარებული ცხოვრების ისტორია, თუმცა მათ არ დაუკარგავთ მომავლის იმედი და რწმენა სამართლიანობის მიმართ. უსამართლობის და ძალმომრეობის მაგალითად ჯერ კიდევ რჩება რუსული საოკუპაციო ძალების მიერ უკანონოდ აღმართული მავთულხლართები", — წერს თალაკვაძე საკუთარ ფეისბუქ გვერდზე.

თალაკვაძე ამბობს, რომ სტრასბურგის სასამართლოს გადაწყვეტილება პირველი სამართლებრივი შეფასებაა საერთაშორისო სასამართლოს მიერ. მისი თქმით, ეს არის მნიშვნელოვანი ნაბიჯი სამართლიანობის აღდგენის გზაზე.

პარლამენტის თავმჯდომარე მადლობას უხდის იუსტიციის ყოფილ მინისტრს, თეა წულუკიანსა და მის მოადგილეებს, თავდაცვის, საგარეო და შინაგან საქმეთა სამინისტროებს, სახელმწიფო უსაფრთხოების სამსახურსა და ყველა იმ საჯარო მოხელეს, ვინც საქართველოს ინტერესებს იცავდა სტრასბურგის სასამართლოში.

"საქართველო აგრძელებს სამართლებრივ და მშვიდობიან გზას ოკუპაციის დასრულების და ტერიტორიული მთლიანობის აღდგენისკენ", — განაცხადა არჩილ თალაკვაძემ.

ადამიანის უფლებათა ევროპული სასამართლოს დიდმა პალატამ აგვისტოს 2008 წლის ომზე საქართველოს ძირითადი სარჩელი დააკმაყოფილა. კერძოდ, სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არადამიანური და ღირსების შემლახველი მოპყრობისთვის რუსეთი დაადანაშაულა.

სასამართლოს დიდმა პალატამ, ასევე, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.