საქართველოს ჟურნალისტური ეთიკის ქარტია მოუწოდებს შინაგან საქმეთა სამინისტროს, გამოიძიოს On.ge-ს ჟურნალისტის პროფესიულ საქმიანობაში ხელშეშლის ფაქტი და გაატაროს პრევენციული ღონისძიებები, რათა სამართალდამცავებმა დაიცვან და უზრუნველყონ ჟურნალისტების უსაფრთხოება, შეუქმნან მათ ნორმალური სამუშაო პირობები.

2021 წლის 16 იანვარს, საპროტესტო აქციის გაშუქებისას სამართალდამცავებმა პროფესიული მოვალეობის შესრულებაში ხელი შეუშალეს On.ge-ის მთავარ რედაქტორს, ჟურნალისტ ხატია ღოღობერიძეს.

ეს ფაქტი ასახულია On.ge-ის ჟურნალისტისა და ტელეკომპანია მთავარი არხის მიერ გადაღებულ კადრებში, სადაც ჩანს როგორ ეცემა ძირს რეპორტიორი გადაღების პროცესში. კადრებში ისმის, რომ ჟურნალისტი რამდენჯერმე იმეორებს სიტყვებს: "ჟურნალისტი ვარ" — მიუხედავად ამისა, სამართალდამცავები მას უხეშად აწვებიან და აქცევენ.

"სამართალდამცავი სტრუქტურების სწორ და სწრაფ რეაგირებაზე მნიშვნელოვნად არის დამოკიდებული რამდენად შეიცვლება გასული წელის ტენდენცია. 2020 წლის 8 ნოემბერს, ცესკოსთან გამართულ აქციაზე გაფრთხილების გარეშე წყლის ჭავლის გაშვების შედეგად რამდენიმე ჟურნალისტი დაშავდა და ტექნიკა დაუზიანდა. ჟურნალისტებს მუშაობაში ხელი შეეშალათ 2020 წლის საპარლამენტო არჩევნების გაშუქებისასაც", — წერია ქარტიის განცხადებაში.

ეთიკის ქარტია, ასევე მიმართავს მმართველ პარტიას დააფიქსიროს მკაფიო და ცალსახა პოზიცია მედიის საქმიანობის ხელისშეშლის დაუშვებლობასთან დაკავშირებით და გასცეს სათანადო რეკომენდაციები, რათა აქციებზე ჟურნალისტები დაცული იყვნენ სამართალდამცველთა ქმედებების შედეგად დაშავებისგან.