ჯანდაცვის მინისტრის მოადგილის, თამარ გაბუნიას განცხადებით, იმუნიზაციის პროგრამას ვაქცინის გვერდითი რეაქციების მონიტორინგის სისტემა აქვს, რაც ნიშნავს იმას, რომ მთელი რიგი სხვადასხვა ტიპის გამოვლინებები, რაც ვაქცინას შეიძლება თან ახლდეს, აღწერილია დოკუმენტაციაში, რომელიც ვაქცინასთან ერთად იგზავნება.

"უსაფრთხოების მონიტორინგი არის ის აუცილებელი პირობა, რაც ქვეყანას უნდა ჰქონდეს ნებისმიერ შემთხვევაში, მაგრამ განსაკუთრებით, როდესაც ახალი ვაქცინის დანერგვის საქმეს ეხება საკითხი. იმუნიზაციის პროგრამას აქვს გვერდითი რეაქციების მონიტორინგის სისტემა, ანუ ამ შემთხვევაში გვერდითი რეაქცია შეიძლება იყოს ალერგიული რეაქცია მაშინვე ან მოგვიანებით, მთელი რიგი სხვადასხვა ტიპის გამოვლინებები, რაც ვაქცინას, როგორც წესი, თან ახლავს და აღწერილია იმ დოკუმენტაციაში, რაც ჩვენთან ვაქცინასთან ერთად მოდის. ეს არის უმრავლეს შემთხვევაში მსუბუქი გამოვლინებები, საშუალო სიმძიმის. ყველაზე მძიმე, რაც შეიძლება მოსალოდნელი იყოს, ეს არის ანაფილაქსიური რეაქცია, რომელიც საბედნიეროდ, ძალიან იშვიათია, მაგრამ ამისთვის ქვეყანა უნდა იყოს მზად, რომ მოხდეს, ჯერ ერთი, აღრიცხვა, შემდეგ უნდა მოხდეს ანგარიშგება, როგორც ეროვნულ დონეზე და ეს არის იმუნიზაციის ექსპერტების ჯგუფი, რაც სამინისტროსთან მუშაობს, რომლებიც შემდეგ გააანალიზებენ ამ შემთხვევების კავშირს ვაქცინაციის მომენტთან", — განაცხადა გაბუნიამ.

ჯანდაცვის მინისტრმა, ეკატერინე ტიკარაძემ, 12 იანვარს განაცხადა, რომ უახლოეს მომავალში საქართველოში მოსახლეობის აცრა Pfizer-ის ვაქცინით გახდება შესაძლებელი.