ევროპული საქართველოს ერთ-ერთი ლიდერის, ირმა ნადირაშვილის თქმით, სახალხო დამცველის განცხადება ციხეებში არსებული მდგომარეობის შესახებ, ადასტურებს იმას, რაც ისედაც ყველასთვის ნათელი იყო — ციხეს მართავს ე.წ. შავი სამყარო და არა ადმინისტრაცია

"სახალხო დამცველის საგანგებო განცხადებამ დაადასტურა ის, რაც ჩვენ ყველამ ისედაც ვიცოდით, რომ ციხეს მართავს არა მისი ადმინისტრაცია, არამედ შავი სამყარო. ის, რომ კრიმინალი ქვეყანაში არის გაზრდილი, ეს თავისთავად გამომდინარეობს და დაკავშირებულია ციხეში შავი სამყაროს მმართველობასთან და ამაში, მე მგონი, არც არაფერი არ არის გასაკვირი. ხელისუფლება, რომელიც გადაბმულია კრიმინალთან, ქუჩასთან ერთად ატარებს არჩევნებს, ცხადია ვალშია ამ კრიმინალთან და ცხადია, მას უქმნის ისეთ პირობებს, რაზეც დღეს ლომჯარია საუბრობდა", — აცხადებს ნადირაშვილი.

იგი გამოეხმაურა იუსტიციის ყოფილი მინისტრისა, ახლა უკვე პარლამენტის განათების, მეცნიერებისა და კულტურის კომიტეტის თავმჯდომარის, თეა წულუკიანის მიერ სახალხო დამცველის წარმომადგენლის ციხეში, პატიმართან შეხვედრისას გადაღებული კადრების საჯაროდ გავრცელებას.

"სახალხო დამცველის ინსტიტუტის მიმართ უპატივცემულობის პირველი შემთხვევა არ არის. ჩვენ ფაქტები გვაქვს ნანახი, როდესაც თეა წულუკიანმა პირდაპირ, ყოველგვარი კანონის დარღვევით მათი ჩანაწერები და შეხვედრების ვიდეოები გამოაქვეყნა პატიმრებთან. შესაბამისად, ახალი არაფერი არ არის სახალხო დამცველის საგანგებო განცხადებაში. ეს არის ძალიან შემაშფოთებელი", — განაცხადა ირმა ნადირაშვილმა.

დღეს, საქართველოს სახალხო დამცველმა, ნინო ლომჯარიამ განაცხადა, რომ ბოლო თვეების განმავლობაში დაწესებულებების ადმინისტრაციის და ე.წ. ციხის მაყურებლების მიერ მართული გარკვეული ჯგუფი სახალხო დამცველის აპარატის წარმომადგენლებზე სიტყვიერ თავდასხმებს, მუქარასა და აგრესიას სისტემატურად ახორციელებს. სახალხო დამცველის თქმით, ამ უკანონო ქმედებების მიზანი პატიმრებთან მათი კომუნიკაციისა და ციხის ტერიტორიაზე მონიტორინგის განხორციელების ხელშეშლაა.