ქალაქ თბილისის მერის, კახა კალაძის ინფორმაციით, დღეიდან, 20 იანვრიდან, 31 მარტამდე, მაჭავარიანის ქუჩის გარკვეულ მონაკვეთზე მოძრაობა შესაძლებელი იქნება მხოლოდ ერთი მიმართულებით — ნუცუბიძის ფერდობიდან ვაშლიჯვრისკენ.

მუნიციპალიტეტის მთავრობის სხდომაზე კალაძემ ისაუბრა ახალი გზის მშენებლობაზე, რომელიც მუხრან მაჭავარიანის ქუჩას დააკავშირებს მარშალ გელოვანის გამზირთან. პროექტის ფარგლებში, ასევე, დაგეგმილია, მშენებლობის არეალში წყალსადენი მილების განთავსების ტრაექტორიის ცვლილება. სწორედ წყალსადენი მილების მონტაჟის გამო შეიზღუდება მოძრაობა მაჭავარიანის ქუჩის ნაწილზე.

"ამ ეტაპზე უნდა მოხდეს საავტომობილო გზის გასწვრივ, ახლადმოწყობილი წყალსადენის 900, 1 000 და 1 200 მილიმეტრიანი დიამეტრის მილების დაერთება არსებულ, მოქმედ მილსადენებზე, რისთვისაც, საჭიროა მაჭავარიანის ქუჩის ორ ადგილზე — ოპერატიული მართვის ცენტრის შენობიდან ვაშლიჯვრისკენ, ბიპის ბენზინგასამართ სადგურამდე მონაკვეთში უნდა გადაიჭრას ეს გზის არეალი. შესაბამისად მოგვიწევს მოძრაობის შეფერხება", — განაცხადა კახა კალაძემ.

რაც შეეხება გზას, რომელიც მაჭავარიანის ქუჩას მარშალ გელოვანის გამზირთან დააკავშირებს, დედაქალაქის მერის ინფორმაციით, იგი იქნება ორი კილომეტრი სიგრძის, ოთხზოლიანი — ორ-ორი ამსვლელ-ჩამომსვლელი ზოლით.

"პროექტი, ასევე, ითვალისწინებს საყრდენი კედლების, წყალამრიდებისა და თანამედროვე სტანდარტების შესაბამისი გარე განათების ქსელის მოწყობას", — განაცხადა კახა კალაძემ მუნიციპალიტეტის მთავრობის სხდომაზე.

მისი თქმით, გზის მშენებლობა გაზაფხულის ბოლოს, ან ზაფხულის დასაწყისში დასრულდება.