ახალქალაქისა და კუმურდოს ეპარქიის მიტროპოლიტი ნიკოლოზი ამჯერად მანქანის საჭიროებაზე საუბრობს. მისი თქმით, მისი ავტომობილი უკვე ძალიან გაცვეთილია, რადგან ცუდ გზებზე უწევს სიარული. ამის შესახებ მან რუსთავი 2-ის ეთერში განაცხადა.

"რა არის, იცით? მე თავმდაბალი ადამიანი ვარ და არ ვიტყვი უარს ამაზე [მანქანაზე]. კი არ ვარ მაინცდამაინც თავმდაბალი, მაგრამ მართლა ძალიან მძიმე მდგომარეობაა, 2006 წლისაა ჩემი მანქანა და ისეთი გაცვეთილია, იმიტომ, რომ ისეთ ადგილებში ვცვითავ ამ მანქანას, ისეთი დატვირთვა... ნუ, უბრალოდ, თუ გაინტერესებთ მაინცდამაინც, გეტყვით, ყოველ შაბათ-კვირას ჩამოვიდივარ ახალქალაქიდან თბილისში იმ დანგრეულ გზებზე, უკვე რამდენიმე წელია, რათა პატრიარქთან ერთად ვიყო წირვაზე", — განაცხადა მეუფე ნიკოლოზმა.

მეუფე ნიკოლოზს რამდენიმე თვის წინ, მობილურების მაღაზია iStyle-მა iPhone 12 აჩუქა. მან განაცხადა, რომ ამ ტელეფონს ფილმების გადაღებისთვის გამოიყენებდა და ამით ხალხს გაახარებდა.

11 ოქტომბერს, მეუფე ნიკოლოზმა TV პირველის ეთერში განაცხადა, რომ "ბრალს დებენ", თითქოს ბოლო მოდელის iPhone ჰქონდა და მისი მტკიცებით, ეს სიცრუე იყო.

მისი თქმით, iPhone 11 Pro აქვს და ეს ბოლო მოდელი არ არის, რადგან iPhone 12 გამოვიდა. თუმცა, ეს მოდელი Apple-მა ოფიციალურად მისი განცხადებიდან 2 დღის შემდეგ გამოუშვა.

მიტროპოლიტის განმარტავდა, რომ ძვირადღირებული ტელეფონის ეს მოდელი იმიტომ ჰქონდა, რომ "კამერა იარაღია" და მას შეუძლია დაზუმვით გადაიღოს, რაც სურს.