საქართველოს პრეზიდენტის ინიციატივით, ორბელიანების სასახლის ეზოში ქუჩის მუსიკოსების კონცერტი გაიმართება. ონლაინრეჟიმში გადასაცემი კონცერტისთვის ადმინისტრაცია 16 000 ლარამდე გადაიხდის.

პრეზიდენტის მრჩევლის, ირინე შენგელიას განცხადებით, ახალგაზრდა ხელოვანების პოპულარიზაცია და მხარდაჭერა პრეზიდენტის სტრატეგიის ნაწილია, მით უფრო, პანდემიის პერიოდში, როცა მათ მუშაობის შესაძლებლობა არ ეძლევათ.

შენგელია აღნიშნავს, რომ მსგავსი ღონისძიებებით ხაზს უსვამს ორბელიანების სასახლის ღიაობას და სასახლე ტრადიციებს დაიბრუნებს.

კონცერტი 19 იანვარს, 18:00 საათზე დაიწყება და მასში მონაწილეობას მიიღებენ ქუჩის მუსიკოსები, დავით ევგენიძე და ბენდი. კონცერტი გადაიცემა პრეზიდენტის ოფიციალური ფეისბუქგვერდისა და საზოგადოებრივი მაუწყებლის ვებგვერდის საშუალებით.