შრომის ინსპექციის დეპარტამენტის უფროსის, ბექა ფერაძის განცხადებით, 14-17 იანვრის მონაცემებით, აკრძალული საქმიანობის განხორციელების მიზნით დაჯარიმდა 3 ობიექტი. მისი თქმით, ამ პერიოდში სულ შემოწმდა 553 ობიექტი.

"2021 წლის 14-17 იანვრის მონაცემებით, შრომის ინსპექციის ზედამხედველობის შედეგად განხორციელდა 553 ობიექტის შემოწმება, რომელთაგან 485 ობიექტის მიმართ განხორციელდა ზეპირსიტყვიერი გაფრთხილება და ცნობიერების ამაღლების მიმართულებით მათ კიდევ ერთხელ მიეწოდათ რეკომენდაციები და 65 ობიექტი შემოწმდა დეტალურად. პროტოკოლით განსაზღვრული მოთხოვნების შესაბამისობის დადგენის მიზნით და დადგინდა, რომ ისინი სრულად აკმაყოფილებენ მოთხოვნებს. ამავე პერიოდში, 322-ე დადგენილების მიხედვით აკრძალული საქმიანობის განხორციელებისთვის დაჯარიმდა 3 ობიექტი, მათგან ერთ-ერთი ობიექტი ახორციელებდა დახურულ სოციალურ ღონისძიებას, რომელსაც ესწრებოდა 100-ზე მეტი ფიზიკური პირი", — აცხადებს ფერაძე.

ფერაძე აღნიშნავს, რომ 2020 წლის 28 ნოემბრიდან, 2021 წლის 17 იანვრის ჩათვლით ზედამხედველობა განხორციელდა სულ 48 589 ობიექტზე.