საზოგადოებრივი მაუწყებლის ყოფილი გენერალური დირექტორი და ქართული ოცნების თავმჯდომარის ახალდანიშნული მოადგილე, ვასილ მაღლაფერიძე აცხადებს, რომ თანამდებობაზე შეთავაზება დაახლოებით ერთი თვის წინ მიიღო. მისი თქმით, თავდაპირველად ირაკლი კობახიძე ესაუბრა, შემდეგ კი პარტიის სხვა ლიდერები.

"ტელევიზიიდან წავედი სადღაც ივლისში და აგვისტოში, კარგია რომ ვგეგმავდეთ მაგრამ ქართველები ასე არ ვგეგმავთ. ეს [შემოთავაზება] იყო დაახლოებით ერთი თვის წინ. ირაკლი კობახიძე იყო პირველი, შემდეგ კახი კალაძე, მაია ცქიტიშვილისგან იყო ამაზე საუბარი და როგორც ხდება", — განაცხადა მან და აღნიშნა, რომ არსებული გამოწვევების ფონზე შეთავაზება საინტერესოდ მოეჩვენა.

მისივე თქმით, დროთა განმავლობაში გამოჩნდება რა ფუნქციები ეკისრება — პარტიის თავმჯდომარის ხელშეწყობა, საზოგადოებასთან ურთიერთობა და ა.შ.

"კონკრეტულად მე რა მექნება ეს თანდათან გამოჩნდება, ბუნებრივია, ეს არის პარტიის მუშაობის ორგანიზება და მისი სტრუქტურების გაძლიერება და მისი, ასე ვთქვათ, საზოგადოებასთან ურთიერთობა და ა.შ. თავმჯდომარის მოადგილის პირველი ფუნქცია არის თავმჯდომარესთან რაღაცნაირად ხელის შეწყობა", — განაცხადა მან.

მაღლაფერიძე ამბობს, რომ ქართულ ოცნებაში "საინტერესო გუნდია", რომელიც ღირსეულად გაართმევს თავს გამოწვევებსა და პასუხისმგებლობებს.

"მე ვფიქრობ, ძალიან საინტერესო ეტაპი იწყება, იმიტომ, რომ წავიდა ძალიან მნიშვნელოვანი და გამოკვეთილი ლიდერი და პარტიამ უნდა გააგრძელოს ფუნქციონირება მის გარეშე. ეს არ არის ხშირი მოვლენა საქართველოში და ძალიან დიდი პასუხისმგებლობა აწევს ამ პარტიას", — განაცხადა მან.

საზოგადოებრივი მაუწყებლის ყოფილი გენერალური დირექტორი ვასილ მაღლაფერიძე ქართული ოცნების თავმჯდომარის მოადგილე და პოლიტსაბჭოს წევრი გახდა.

მაღლაფერიძემ საზოგადოებრივი მაუწყებლის დირექტორის თანამდებობა 18 აგვისტოს დატოვა და ამტიცებდა, რომ გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

გარდა ამისა, მან ჟურნალისტებს უთხრა გამოერიცხათ, რომ საკანონმდებლო ან აღმასრულებელ ხელისუფლებაში რაიმე თანამდებობის დაკავებას აპირებდა. ის ამტკიცებდა, რომ მუშაობას ტელესკოლაში, საგანმანათლებლო პროექტებზე გააგრძელებდა.

"ერთადერთი, რაზეც მუშაობას გავაგრძელებ, რაც ჩემთვის მნიშვნელოვანი და საპატიოა, ტელესკოლაში, რომელიც შევქმენით, მაქვს ორი საგანმანათლებლო პროექტი. ამას გავაკეთებ იანვრამდე, იანვრის მერე შევხედოთ როგორ იქნება საქმე", — ამბობდა ის.

საზოგადოებრივი მაუწყებლის გენერალური დირექტორი ვასილ მაღლაფერიძე 2017 წელს გახდა. მანამდე ის ქართული ოცნების დამფუძნებლისა და ყოფილი თავმჯდომარის, ბიძინა ივანიშვილი ოჯახის კუთვნილ ტელეკომპანია GDS-ში გადაცემა 2030-ის გენერალურ პროდიუსერად მუშაობდა. სხვადასხვა დროს ის იყო TV9-ის, რომელიც ასევე ბიძინა ივანიშვილის ოჯახს ეკუთვნის, დირექტორის მოადგილე, ჟურნალ კალმასობას მთავარი რედაქტორი, გაზეთ კავკასიონის დამფუძნებელი, რედაქტორი და მთავარი კონსულტანტი. გარდა ამისა, 2 მოწვევის პარლამენტის წევრი, ნაციონალური მოძრაობის ხელისუფლებაში ყოფნის დროს გუბერნატორი და სახალხო დამცველის აპარატის ინფორმაციისა და პოლიტიკის დეპარტამენტის უფროსი.