პრემიერმინისტრი გიორგი გახარიას განცხადებით, საქართველოს მოქალაქეებს ხარისხიანი ვაქცინა ექნებათ, რომელიც საერთაშორისო ორგანიზაციების მიერ იქნება ავტორიზებული. მთავრობის სხდომის დაწყების წინ გახარიამ აღნიშნა, რომ ვაქცინასთან დაკავშირებით ბევრი "აბსურდული ჭორი" ისმის.

როგორც პრემიერმა განმარტა, ვაქცინაციისთვის შექმნილია სპეციალური კომისია, რომელსაც ჯანდაცვის სამინისტრო ხელმძღვანელობს და რამდენიმე ამოცანას ისახავს მიზნად: ლოჯისტიკასთან დაკავშირებული საკითხების მოგვარება და მოქალაქეების ვაქცინაციისთვის მომზადება, პრიორიტეტული ჯგუფების განსაზღვრა და რაც შეიძლება სწრაფად ვაქცინის შემოტანა.

"პირველი ორი მიზანი ჯანდაცვის სამინისტროს უკვე დამუშავებული აქვს და გეგმა არსებობს, ორშაბათს წარმოადგენენ გეგმას. არანაირი საფუძველი არ არსებობს კითხვის ნიშნების არსებობის, საქართველოს მოქალაქეებს ექნებათ ყველა ის ხარისხიანი ვაქცინა, რომელიც საერთაშორისო შესაბამისი ორგანიზაციების მიერ იქნება ავტორიზებული", — განაცხადა გახარიამ.

13 იანვარს ჯანდაცვის მინისტრმა, ეკატერინე ტიკარაძემ განაცხადა, რომ უახლოეს მომავალში საქართველოში მოსახლეობის აცრა Pfizer-ის ვაქცინით გახდება შესაძლებელი.

Pfizer-BioNTech-ის ვაქცინას იყენებენ აშშ-ში, დიდ ბრიტანეთში, კანადასა და ევროკავშირის ქვეყნებში. ის დამტკიცებულია ჯანდაცვის მსოფლიო ორგანიზაციის მიერაც.

10 იანვარს ინფექციური საავადმყოფოს დირექტორმა, თენგიზ ცერცვაძემ განაცხადა, რომ საქართველოში ორი ვაქცინის — AstraZeneca და ერთ-ერთი ჩინური ვაქცინის შემოტანა განიხილება.

მოგვიანებით ჯანდაცვის მინისტრის მოადგილემ, თამარ გაბუნიამ განმარტა, რომ ჩინური ვაქცინის შემოტანა საქართველოში ჯერ არ განიხილება, რადგან ის არაა აღიარებული არცერთი მკაცრი მარეგულირებლისა და WHO-ს მიერ. მისივე თქმით, ამ ეტაპზე Pfizer-ის, AstraZeneca-სა და Moderna-ს ვაქცინები განიხილება.

როგორც ჯანდაცვის უწყებაში აცხადებენ, საქართველოს ვაქცინის 1,4 მილიონი დოზა აქვს შეკვეთილი.