დაავადებათა კონტროლის ცენტრის დირექტორის მოადგილის, პაატა იმანძის განცხადებით, არ განიხილავენ, რომ კორონავირუსის ვაქცინა სავალდებულო იყოს. მისი თქმით, მსჯელობა არც იმაზე ჰქონიათ, რომ ვაქცინაცია სავალდებულო გახდეს სამედიცინო სფეროს წარმომადგენლებისთვის.

"სავალდებულო ჩვენი კანონმდებლობით სამედიცინო პერსონალისთვის არის გრიპის აცრა, წითელას აცრა. კოვიდზე არ ვფიქრობთ რომ სავალდებულო იყოს, ჩემი კოლეგებისთვისაც კი. ჯერ ამაზე ბჭობა საერთოდ არ ყოფილა, რომ სავალდებულო გახდეს თუნდაც პროფესიული ჯგუფებისთვის",— განაცხადა მან პოლიტიკის ფორმულაში.

13 იანვარს ჯანდაცვის მინისტრმა, ეკატერინე ტიკარაძემ განაცხადა, რომ უახლოეს მომავალში საქართველოში მოსახლეობის აცრა Pfizer-ის ვაქცინით გახდება შესაძლებელი.

Pfizer-BioNTech-ის ვაქცინას იყენებენ აშშ-ში, დიდ ბრიტანეთში, კანადასა და ევროკავშირის ქვეყნებში. ის დამტკიცებულია ჯანდაცვის მსოფლიო ორგანიზაციის მიერაც.

10 იანვარს ინფექციური საავადმყოფოს დირექტორმა, თენგიზ ცერცვაძემ განაცხადა, რომ საქართველოში ორი ვაქცინის — AstraZeneca და ერთ-ერთი ჩინური ვაქცინის შემოტანა განიხილება.

მოგვიანებით ჯანდაცვის მინისტრის მოადგილემ, თამარ გაბუნიამ განმარტა, რომ ჩინური ვაქცინის შემოტანა საქართველოში ჯერ არ განიხილება, რადგან ის არაა აღიარებული არცერთი მკაცრი მარეგულირებლისა და WHO-ს მიერ. მისივე თქმით, ამ ეტაპზე Pfizer-ის, AstraZeneca-სა და Moderna-ს ვაქცინები განიხილება.

როგორც ჯანდაცვის უწყებაში აცხადებენ, საქართველოს ვაქცინის 1,4 მილიონი დოზა აქვს შეკვეთილი.