დაავადებათა კონტროლის ცენტრის დირექტორის მოადგილის, პაატა იმნაძის განცხადებით, კორონავირუსის იმუნიზაციის გეგმა მალე გამოქვეყნდება და ცნობილი გახდება, ვინ როდის შეძლებს აცრას.

"იმუნიზაციის გეგმა გამოქვეყნდება, შეიძლება, ერთ-ორ დღეში გამოვაქვეყნოთ ეს გეგმა, ცნობისმოყვარეებმა რომ ნახონ",— განაცხადა მან პოლიტიკის ფორმულაში.

მოგვიანებით ამავე ეთერში მან განაცხადა, რომ პირველი ჯგუფი, ვინც აიცრება იქნება სამედიცინო პერსონალი, მეორე — მოხუცებულთა თავშესაფრები და მათი პერსონალი, მესამე — 75 წელს გადაცილებული ადამიანები, მეოთხე — 65 წელს გადაცილებული ადამიანები და ა.შ.

ბოლო პერიოდში კორონავირუსის ვაქცინებთან დაკავშირებით არაერთი კითხვა გაჩნდა, მათ შორის ისიც, ვინ აიცრება პირველი, როცა ქვეყანაში ვაქცინა შემოვა.

პაატა იმნაძემ დღეს, 14 იანვარს განაცხადა, რომ არარისკჯგუფებისთვის კორონავირუსის ვაქცინა საქართველოში ზაფხულში ან შემოდგომის დასაწყისისთვის შემოვა.

"რეალისტები თუ ვიქნებით, ადამიანებისთვის, რომლებისთვისაც კოვიდი სასიცოცხლო რისკის დაავადებას არ წარმოადგენენ კორონავირუსზე აცრას სადღაც ზაფხულში, ან შემოდგომის დასაწყისში შეძლებენ", — განაცხადა იმნაძემ.

ჯანდაცვის მინისტრმა, ეკატერინე ტიკარაძემ, 12 იანვარს განაცხადა, რომ უახლოეს მომავალში საქართველოში მოსახლეობის აცრა Pfizer-ის ვაქცინით გახდება შესაძლებელი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: