ევანგელურ-ბაპტისტური ეკლესიის ეპისკოპოსის, მალხაზ სონღულაშვილის განცხადებით, უკვე ათი წელია მუსლიმებთან სოლიდარობის ნიშნად ჯვარს არ ატარებს. ამის შესახებ მან ფორმულას ეთერში ისაუბრა.

"ვფიქრობ, რომ ციხისძირიდან დაიწყო ეს ამბავი, როდესაც მუსლიმურ სოფელში შეიჭრნენ სამხედრო პოლიციის წარმომადგენლები სამხედრო მანქანით [სავარაუდოდ, მალხაზ სონღულაშვილი გულისხმობს 2013 წლის 14 აპრილს მომხდარ ინციდენტს], რეალურად ხელისუფლების წარმომადგენლები და ფიზიკური შეურაცხყოფა მიაყენეს ადამიანებს, რომლებსაც ჯვრები [არ] ეკეთათ. უკვე 10 წელია, მე ჯვარს არ ვატარებ საქართველოში მუსლიმებთან სოლიდარობის ნიშნად. თუ ეს არის ქვეყანა, სადაც ადამიანს სცემენ იმის გამო, რომ ჯვარი არ უკეთია, მე არ შემიძლია, ამ ქვეყანაში ჯვარი ვატარო", — აღნიშნა სონღულაშვილმა.

სასულიერო პირის თქმით, ადრე თუ გვიან მუსლიმების მიმართ გამოვლენილი დისკრიმანიიცთვისა და შეურაცხყოფისთვის ბოდიშის მოხდა მოგვიწევს.

ჩოხატაურის მუნიციპალიტეტის სოფელ ბუკნარში მუსლიმი თემი სამლოცველოს მოწყობას ითხოვს, რასაც ადგილობრივი ქრისტიანები ეწინააღმდეგებიან.

რელიგიურ ნიადაგზე დაწყებული კონფლიქტი მუსლიმებსა და მართლმადიდებლებს შორის გუშინ, 12 იანვარს დაიწყო. ადამიანის უფლებების სწავლებისა და მონიტორინგის ცენტრის (EMC) ინფორმაციით, ბუკნარში მეზობლებს შორის მომხდარი ურთიერთშელაპარაკების დროს მძიმე ფიზიკური დაზიანებები მიაყენეს სამ მუსლიმს, მათ შორის მუსლიმ ბავშვებს. დაშავებულები კი მიღებული არაერთი დაზიანებით საავადმყოფოში გადაიყვანეს.

ბუკნარში მომხდარ დაპირისპირებას გამოეხმაურა სახალხო დამცველი. ნინო ლომჯარიამ სოფელში განვითარებულ მოვლენებს სამწუხარო ფაქტი უწოდა და აღნიშნა, რომ მსგავსი შემთხვევა პირველი არ არის, სახელმწიფოს კი თითოეული მოქალაქის ლოცვის უფლების დაცვისკენ მოუწოდა.

ამავე თემაზე: