ბელგიაში, ბრიუსელში პროტესტის დროს, რომელიც 23 წლის ბიჭის გარდაცვალებას მოჰყვა, მეფე ფილიპის მანქანა დაზიანდა.

დემონსტრანტებმა პოლიციის სამმართველოს ცეცხლი მოუკიდეს, რის შედეგადაც პოლიციამ რამდენიმე ადამიანი დააკავა, რამდენიმე კი დაშავდა კიდეც.

ბელგიის პოლიციის განცხადებით, ოთხშაბათს საღამოს ბრიუსელის ერთ-ერთ პოლიციის შენობასთან დაახლოებით 500 ადამიანი შეიკრიბა. ისინი Ibrahima B-ს საპყრობილეში გარდაცვალებას აპროტესტებდნენ.

აღნიშნიული პირი სამართალდამცავებმა შაბათს საღამოს მას შემდეგ დააკავეს, რაც ის სხვა ადამიანებთან ერთად კორონავირუსის წინააღმდეგ დაწესებული შეზღუდვების შემოწმებისას მისულ პოლიციას გაექცა.

ოფიციალური პირების თქმით, მან გონება პოლიციის განყოფილებაში გადაყვანის შემდეგ დაკარგა, რის გამოც საავადმყოფოში გადაიყვანეს, თუმცა მისი გადარჩენა ვერ მოხერხდა.