თბილისის ინფექციური პათოლოგიისა და შიდსის ცენტრის გენერალური დირექტორის, თენგიზ ცერცვაძის განცხადებით, ჩინური ვაქცინის შემოტანაზე რეკომენდაცია მას არ გაუცია. ცერცვაძის თქმით, ეს საკითხი მისი გადასაწყვეტი არ არის.

"პირადად მე საქართველოსთვის ოპტიმალურად მიმაჩნია ინგლისის ოქსფორდის უნივერსიტეტის და კომპანია AstraZeneca-ს მიერ წარმოებული ვაქცინის შემოტანა, ვინაიდან ეს უკანასკნელი არის მაღალი ხარისხის და სანდოობის. რაც შეეხება ჩინური წარმოების ვაქცინას, მე აღვნიშნე და ვრჩები იმ აზრზე, რომ ის არ არის ხელწამოსაკრავი და შესაძლოა იყოს არანაკლებ ეფექტიანი, რის სასარგებლოდაც მეტყველებს თუნდაც ის ფაქტი, რომ ამ ვაქცინით ხდება მოსახლეობის ვაქცინირება ჩინეთში და ეს ვაქცინა შეიძინეს ისეთმა ქვეყნებმა, როგორიცაა თურქეთი, არაბთა გაერთიანებული საემიროები, ბრაზილიადა სხვ. მაგრამ ვიმეორებ, რომ მე არ გამიცია რეკომენდაცია ამ ვაქცინის შემოტანაზე", — განმარტავს ცერცვაძე.

თენგიზ ცერცვაძემ 10 იანვარს განაცხადა, რომ ქვეყანაში ორი ვაქცინის — ასტრა ზენეკასა და ერთ-ერთი ჩინური ვაქცინის შემოტანა განიხილება. მისი თქმით, კორონავირუსი ჩინეთში გაჩნდა და შესაბამისად, მისი სტრუქტურა და თავისებურებები ჩინელებმა ყველაზე უკეთ იციან.

8 იანვარს ჯანდაცვის მინისტრმა, ეკატერინე ტიკარაძემ განაცხადა, რომ შესაძლოა თებერვალში საქართველოს ვაქცინის გარკვეული დოზა კოვაქს პლატფორმამ მიაწოდოს, რომელიც რისკ ჯგუფებზე გადანაწილდება.

გაიგეთ მეტი: