საგანგებო სიტუაციების მართვის სამსახურის ინფორმაციით, ტყის და მინდვრის ხანძრები სრულად ლიკვიდირებულია.

უწყებაში ამბობენ, რომ ბოლო დღეების განმავლობაში, ხანძრის 300-ზე მეტ კერას 700-ზე მეტი მეხანძრე-მაშველი, 100-მდე სახანძრო-სამაშველო ტექნიკა და სასაზღვრო პოლიციის ვერტმფრენი ებრძოდა.

"სახანძრო უსაფრთხოების პროტოკოლის მიხედვით, კერებზე კონტროლისა და მონიტორინგის მიზნით დარჩებიან მეხანძრე-მაშველები", — ვკითხულობთ საგანგებო სიტუაციების მართვის სამსახურის განცხადებაში.

უწყება მოქალაქეებს მინდვრებსა და სახნავ-სათეს მიწებზე ცეცხლის დანთებისგან თავის შეკავებისკენ, ხოლო მონადირეებს ტყეებში გადაადგილებისას უსაფრთხოების წესების დაცვისკენ მოუწოდებს.

ხანძარი იყო სამეგრელოში, გურიაში, აჭარაში, იმერეთში, სამცხე-ჯავახეთში, შიდა ქართლსა და აფხაზეთში.

ხანძარს ოკუპირებულ აფხაზეთში ამ დრომდე ებრძვიან. გაგრიდან გავრცელებული ვიდეოებიდან და ფოტოებიდან ჩანს, რომ ცეცხლი დასახლებულ პუნქტს უახლოვდება. საქართველოს ხელისუფლებაში განაცხადეს, რომ დე ფაქტო ხელისუფლებას დახმარება შესთავაზეს და პასუხის მიღებისთანავე ჩაერთვებიან ხანძრის ქრობის პროცესში. საპასუხოდ, აფხაზეთის დე ფაქტო რესპუბლიკის უსაფრთხოების საბჭოს მდივანმა, სერგეი შამბამ განაცხადა, რომ აფხაზეთის ტყეების ხანძრის ჩაქრობაში საქართველოს დახმარება არ სჭირდება.

სავარაუდოდ, ტყის ხანძრების გამო ოკუპირებული აფხაზეთის ნაწილს ელექტროენერგია არ მიეწოდება.

გაიგეთ მეტი: