ინდოეთის ერთ-ერთ საავადმყოფოში ხანძრის შედეგად 10 ჩვილი დაიღუპა. როგორც BBC წერს, ზოგიერთი ბავშვი სულ რამდენიმე დღის დაბადებული იყო, ყველაზე უფროსი კი — სამი თვის.

მაჰარაშტრას შტატის ქალაქ ბჰანდარას საავადმყოფოში მაშველებმა ცეცხლისგან შვიდი ჩვილის გადარჩენა შეძლეს. ინდოეთის პრემიერმინისტრმა, ნარენდრა მოდიმ ინციდენტს "გულის გამგმირავი ტრაგედია" უწოდა.

ცეცხლის გაჩენის მიზეზი ჯერ უცნობია და გამოძიება მიმდინარეობს. შტატის ჯანდაცვის მინისტრის თქმით, პირველადი ინფორმაციით, ხანძარი მოკლე ჩართვამ გამოიწვია.

საავადმყოფოს თანამშრომლების თქმით, ცეცხლი ღამის 2 საათზე გაჩნდა. ადგილობრივი მედიის ინფორმაციით, პალატაში განმეორებითი აფეთქებების გამო მაშველებს მუშაობა ურთულდებოდათ.