დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, საპატრიარქოში დილიდან ეპიდკვლევა მიმდინარეობს. გამყრელიძის თქმით, კორონავირუსზე ტესტი ყველას, საჭიროებისამებრ, ჩაუტარდება.

"ეპიდემიოლოგები დილიდან მუშაობენ საპატრიარქოში, იქ ეპიდკვლევა და, ასევე, ლაბორატორიული ნიმუშების აღება მიმდინარეობს იმ ადამიანებისგან, ვინც საპატრიარქოში დადასტურებულ შემთხვევებთან კონტაქტში მყოფი პირები იყვნენ", — განაცხადა გამყრელიძემ TV პირველთან სატელეფონო კომენტარში.

ილია მეორის მდივან-რეფერანტს, შორენა თეთრუაშვილს კორონავირუსი, 8 იანვარს, დაუდასტურდა.

4 იანვარს, თეთრუაშვილი საპატრიარქოში ილია მეორის დაბადების დღისადმი მიძღვნილ საღამოს ესწრებოდა. საპატრიარქოს საზოგადოებასთან ურთიერთობის სამსახურის მიერ გავრცელებულ ვიდეოში ილია მეორეს სიახლოვეს მოძრავი შორენა თეთრუაშვილიც ჩანს. ღონისძიებას სტუმრები და მღვდელმთავრები ესწრებოდნენ. პატრიარქის ექიმის, ცისანა შარტავას თქმით, შორენა თეთრუაშვილს პატრიარქთან კონტაქტი არ ჰქონია.