რა აკავშირებთ ერთმანეთთან ციფრულ მენიუს, გარემოს გამწვანებაზე ორიენტირებულ აპლიკაციასა და პლატფორმას, რომელიც პაციენტს შეყვანილი სიმპტომების მიხედვით ექიმთან ამისამართებს? ჩამოთვლილი სამივე წამოწყება ინოვაციურია და ამ სერვისების შემქმნელი კომპანიები Augep, Treepex და Persomedic საქართველოს Eurasia Mobile Challenge-ზე წარადგენენ.

Eurasia Mobile Challenge-ის მიზანია, ევროპისა და აზიის ახალგაზრდობა თანამედროვე ციფრული ტექნოლოგიების განვითარებაში ჩართოს და შექმნას ახალი წარმატებული მობილური პროექტები. კონკურსი კომპანია ბილაინის სოციალური პასუხისმგებლობის ახალი კამპანიის, Make Your Mark-ის ფარგლებში ტარდება. წელს საქართველოს შიდა შესარჩევ კონკურსში 1000 გუნდი მონაწილეობდა, რაც 2015 წელთან შედარებით ორჯერ მეტია. ჟიურის წევრებმა რვა მონაწილე ქვეყნიდან სამ-სამი გუნდი შეარჩიეს. გამარჯვებული 24 გუნდი კი ერთმანეთს 24 და 25 იანვარს ერევანში შეხვდება და სოლიდური საპრიზო ფონდისთვის იბრძოლებს: I ადგილი - 20 000$, II ადგილი - 15 000$, III ადგილი - 10 000$.

რეგიონალური გამარჯვებული, რომლის ვინაობასაც სულ მალე შევიტყობთ, 27 თებერვალს საკუთარ ქვეყანას Global Mobile Challenge-ზე ბარსელონაში წარადგენს.

"პროექტის მიზანია, მოვიწვიოთ და წავახალისოთ თანამედროვედ მოაზროვნე, ნიჭიერი ახალგაზრდები, რომელთაც აქვთ პოტენციალი, შექმნან გაუმჯობესებული, ფინანსურად მომგებიანი პროდუქტი. ჩვენ გვინდა, მივცეთ მათ შესაძლებლობა, მიაღწიონ წარმატებას რეგიონალურ და გლობალურ ბაზრებზე, რაც შემდგომ მათ მომავალს განსაზღვრავს", - აღნიშნავს ბილაინის გენერალური დირექტორი, გიორგი ტყეშელაშვილი.

აპლიკანტების რაოდენობა ყოველწლიურად იზრდება და საქართველოს სახელით მოასპარეზე გუნდების შერჩევაც უფრო რთულდება. თუ წლევანდელ გამარჯვებულებს გავითვალისწინებთ, საქართველოს რეალური შანსი აქვს რეგიონალურ კონკურსზე.

მაშ ასე, უკეთესად გავიცნოთ გამარჯვებული სამი სტარტაპი:

Augep

მობილური აპლიკაციაა, რომელიც გაფართოებულ რეალობას იყენებს იმისთვის, რომ მომხმარებლებს კერძის შერჩევა გაუადვილოს. თქვენ აღარ დაგჭირდებათ, მიმტანს გამოჰკითხოთ კერძის ინგრედიენტები ან პორციის ზომა. სმარტფონის კამერას თეფშს მიუშვერთ და ვირტუალურად დაათვალიერებთ საკვების შემადგენლობას, გაიგებთ კალორიულობას და შეიქმნით წარმოდგენას, თუ რას უნდა ელოდოთ, სანამ შეკვეთას მოგიტანენ.

Treepex

ვებ და მობილური აპლიკაციაა, რომლის გამოყენებითაც კონკრეტული პროდუქტების რეალიზაციის შემთხვევაში, ერთ პროდუქტზე ირგვება ერთი ხე. ეს დამატებითი მარკეტინგული "იარაღია" კომპანიებისთვის, მომხმარებლებისთვის კი - საშუალება, რომ პროდუქტის შეძენის პარალელურად, სარგებლობა მოუტანონ დედამიწას. მას შემდეგ, რაც ხე დაირგვება, თქვენ შეგიძლიათ გაიგოთ, სად დაირგო ხე თქვენს სახელზე და თვალი ადევნოთ მისი ზრდის პროცესს.

Persomedic

სამედიცინო აპლიკაციაა, რომელიც სიმპტომების გაანალიზების შედეგად, მომხმარებელს შესაბამისი პროფილის ექიმებს ურჩევს და ექიმთან შეხვედრის დაჯავშნის საშუალებასაც აძლევს.

დაველოდოთ, რას იზამენ საქართველოს რჩეული გუნდები ერევანში, Eurasia Mobile Challenge-ის ფინალში. გამარჯვებულებისა და კონკურსის შესახებ დეტალური ინფორმაციისთვის ეწვიეთ კონკურსის ვებგვერდს.