"ნაცნობის თემა ძალიან უხერხულია, მართალი გითხრათ, ამ შემთხვევაში", — ასე უპასუხა ჯანდაცვის მინისტრის მოადგილემ, თამარ გაბუნიამ კითხვას, თუ რატომ ხვდებიან კოვიდპაციენტები კლინიკებში ნაცნობობის გზით. საწოლფონდის მართვის გართულებას ის კლინიკებში თვითდინებით მისულ პაციენტებს უკავშირებს.

როგორც გაბუნიამ საკოორდინაციოს საბჭოს სხდომის შემდეგ გამართულ ბრიფინგზე განმარტა, 112-ს ჰყავს მომლოდინე პაციენტების სია და შეუძლია განსაზღვროს, ვინ არის მძიმედ და ვინ უნდა გადავიდეს სტაციონარში. მისივე თქმით, პაციენტები კლინიკებში თავისით, თვითდინებითაც მიდიან და ეს ვიღაც მხრიდან ზეგავლენას, ნაცნობობას არ უკავშირდება.

"პაციენტები მიდიან კლინიკებში და ჩვენ კლინიკებს ვთხოვთ, რომ როცა პაციენტი მოდის და თვლის, რომ მისი მდგომარეობა მძიმეა, კარს არავის გამოუკეტავენ, აუცილებლად შეაფასონ მისი მდგომარეობა და მიიღონ თუ არის დამძიმებული და ექვემდებარება ჰოსპიტალიზაციას. ხშირია, როცა თვითდინებით მისული პაციენტი, მძიმე პაციენტი შეიძლება უფრო ადრე მოხვდეს კლინიკაში და დაიკავოს ის თავისუფალი ადგილი, რომელიც დილით ვიცოდით, რომ თავისუფალი იყო და ამან გაახანგრძლივოს 112-ის მოლოდინის პერიოდი. ეს არის სურათი. ყველასთან არის თხოვნა, თვითდინებითა და შემოვლითი გზებით ჰოსპიტალში მოხვედრა იწვევს იმას, რომ უფრო მძიმე პაციენტი შეიძლება დარჩეს ბინაზე უფრო დიდხანს ვიდრე სხვა შემთხვევაში დარჩებოდა", — განაცხადა გაბუნიამ.

მისი თქმით, ასეთ ვითარებაში ასპროცენტიანი გადაზღვევა რთულია, რადგან კლინიკა მასთან მისულ პაციენტს უარს ვერ ეტყვის:

"ის, რაც ვერ რეგულირდება, არის დაახლოებით 20-25 პროცენტი. დანარჩენი მაინც მოდის 112-დან. ეს 20-25 პროცენტიც რომ გადავიყვანოთ 112-ში, ბევრად უფრო მარტივი იქნება საწოლფონდების მართვა შეფერხებების გარეშე", — განაცხადა გაბუანიამ.

რამდენიმე დღის წინ ინფექციური საავადმყოფოს დირექტორმა და კლინიკური ჯგუფის ხელმძღვანელმა, თენგიზ ცერცვაძემ არ გამორიცხა, რომ საავადმყოფოებში ადამიანები ნაცნობობით ან ცნობადობით ხვდებოდნენ. მისივე თქმით, ასეთი ერთეული შემთხვევა იქნება.