დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა, ამირან გამყრელიძემ, სამედიცინო პროტოკოლებზე საუბრისას აღნიშნა, რომ მსგავსი საკითხები პროფესიულ წრეებში უნდა განიხილებოდეს და არა საჯარო სივრცეში. ასე გამოეხმაურა იგი ბოლო დღეებში, ინფექციური პათოლოგიებისა და შიდსის ცენტრის დირექტორის, თენგიზ ცერცვაძის კრიტიკასა და ექიმებს შორის მიმდინარე დისკუსიას პანდემიის მართვასთან დაკავშირებით

"აი ეს კრიტიკა, რაც მესმის ახლა მე, ძალიან ღრმად არ შევსულვარ, მაგრამ მოვკარი ყური იმას, რომ არის გამოსვლები, მათ შორის ბატონი თენგიზის, ჩემი უახლოესი ადამიანის და ქვეყანაში ერთ-ერთი ყველაზე მცოდნე ექიმის წინააღმდეგ. ეს საკითხები არის არა ღია სივრცეში, არამედ პროფესიულ სივრცეში განსასჯელი. პროფესიული სხდომები როცა არის, ასოციაციების, თქვენ ვერ წარმოიდგენთ იქ ექიმები როგორ ვკამათობთ ერთმანეთთან — შენ არა ხარ სწორი, შენ აქ დაუშვი შეცდომა, შენ იქ დაუშვი შეცდომა", — განაცხადა გამყრელიძემ პალიტრანიუსის ეთერში.

ექიმები, მათ შორის, უცხოეთში მოღვაწე ქართველი ექიმები ბოლო პერიოდში აქტიურად აკრიტიკებენ საქართველოში პანდემიის მართვის პოლიტიკას. თენგიზ ცერცვაძე აცხადებს, რომ მას დასაბუთებული კრიტიკა არ მოუსმენია. ცერცვაძის თქმით, ექიმები, რომლებიც მაღალგანვითარებულ ქვეყნებში მუშაობენ, საქართველოში მოღვაწე კოლეგებთან შედარებით თავს უფრო მაღლა მდგომებად წარმოიდგენენ.

აღსანიშნავია, რომ ექიმთა ნაწილი, რომელებმაც კრიტიკული განცხადებები გაავრცელეს ქვეყნის პოლიტიკაზე კორონავირუსის მართვასთან დაკავშირებით, საკოორდინაციო საბჭოს ერთ-ერთ სხდომას ონლაინ რეჟიმში დაესწრო.

გაიგეთ მეტი: