ეკონომიკის მინისტრის, ნათია თურნავას განცხადებით, მთავრობა მოქალაქეებისთვის ახალ საკომპენსაციო პაკეტზე მუშაობს. მისი განმარტებით, პაკეტი მიმართული იქნება როგორც მოქალაქეების მიმართ, ასევე იმ დარგების მიმართ, რომლებსაც წერტილოვანი შეზღუდვები შეეხება.

"ჩვენ ეს დღეები პრემიერ-მინისტრთან ერთად ძალიან ინტენსიურად ვმუშაობთ. ერთი მხრივ ეპიდემიოლოგიური ვითარებიდან გამომდინარე, წერტილოვანი შეზღუდვები გვინდა იყოს დაბალანსებული და ამავდროულად, გვინდა, რომ შევძლოთ გადავტეხოთ ის უარყოფითი ტენდენცია რაც გვაქვს ინფიცირებულთა ზრდის თვალსაზრისით. პარალელურად, ვეძებთ ისეთ გზებს, რომ ბიზნესი ძალიან არ დავაზარალოთ და შევინარჩუნოთ მათი გაჯანსაღების ტენდენცია", — განაცხადა თურნავამ.

რამდენიმე დღეა მთავრობის ეკონიმიკური გუნდი ბიზნესის წარმომადგენლებს ხვდებიან. როგორც მინისტრები აცხადებენ, მათ არს სურთ სფეროებთან მოლაპარაკებების გარეშე შეზღუდვების მიღება. ამავე დროს, სხვადასხვა სფეროს წარმომადგენლები აცხადებენ, რომ ნებისმიერი შეზღუდვა მათზე ცუდად აისახება.