იმუნოლოგ-ალერგოლოგის, ბიძინა კულუმბეგოვის თქმით, ბევრი ვარიანტი განიხილება და, სავარაუდოდ, რამდენიმე დღეში იქნება გაცხადებული. აღნიშნული კულუმბეგოვმა პრემიერმინისტრთან, გიორგი გახარიასთან და ჯანდაცვის სფეროს ექსპერრტებთან შეხვედრის შემდეგ თქვა. კულუმბეგოვის განცხადებას მთავრობა ავრცელებს.

"ეპიდემიასაც ამ დონეზე ვერ დავტოვებთ, ბუნებრივია, ჩვენ მასზე უნდა ვიმოქმედოთ. რა თქმა უნდა, იყო ბევრი ვარიანტის განხილვა, ბევრი მსჯელობა, რომ დეკემბერი-იანვარი იქნება გადამწყვეტი თვეები, როდესაც ჩვენ, რეალურად, უნდა შევძლოთ ეპიდემიის კონტროლზე აყვანა, აქ საუბარი არ არის რომ ეპიდემია დასრულდება ამ რამდენიმე კვირაში და თვეში, მაგრამ საუბარია, რომ ჩვენი ჯანდაცვის სისტემის ის კრიტიკული შეუსაბამობა, რაც რეალურად გვაქვს და გვემუქრება პაციენტების რაოდენობასა და ამ შესაძლებლობებს შორის, ეს ყველაფერი უნდა დაბალანსდეს. ეს ვარიანტები ბევრია, იხილება, უფლებამოსილი, რასაკვირველია, საკოორდინაციო საბჭოა და ეს, ალბათ, რამდენიმე დღეში იქნება გაცხადებული", — განაცხადა ბიძინა კულუმბეგოვი.

მისი თქმით, შეხვედრაზე საუბარი იყო არსებულ ეპიდემიოლოგიურ ვითარებაზე და იმ საპირწონე ღონისძიებებზე, რომელიც ეპიდემიის ამ ძალიან სერიოზულ ტრაექტორიაზე გავლენას მოახდენს.

"ჩვენ ყველაფერი უნდა გავაკეთოთ იმისთვის, რომ ეკონომიკური გავლენა იყოს მინიმალური საზოგადოებაზე, ზოგადად ქვეყანაზე; ეპიდემიასაც ამ დონეზე ვერ დავტოვებთ, ჩვენ მასზე უნდა ვიმოქმედოთ. ერთი მთავარი კონსენსუსი, რაც რეალურად არის მიღწეული გახლავთ ის, რომ ჩვენ ყველაფერი უნდა გავაკეთოთ იმისთვის, რომ ეკონომიკური გავლენა იყოს მინიმალური საზოგადოებაზე, ზოგადად ქვეყანაზე", — განაცხადა კულუმბეგოვმა.

დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ 24 ნოემბერს განაცხადა, რომ ის თუ რა შეზღუდვებს უნდა ველოდოთ უახლოეს დღეებში, სავარაუდოდ, 25 გამოცხადდება.