წერეთლის გამზირზე მიკროსაფინანსო ორგანიზაცია MBC-ში შეჭრას და მძევლების აყვანას ბრალდებულის ადვოკატი "პერფორმანსს" უწოდებს. მისი მტკიცებით, ეს იყო პროტესტის ფორმა. ამის შესახებ გიორგი ჭოჭუამ ტელეკომპანია ფორმულასთან ისაუბრა.

"ეს იყო მისთვის პროტესტის გამოხატვის ერთ-ერთი ფორმა, პრაქტიკულად, როგორც პერფომანსი, ისე გაითამაშა მან ეს აზარტული თამაშების, საბანკო პროცენტების და გაძვირებული მედიკამენტების წინააღდმეგ. შეიარაღებული საერთოდ არ იყო, ეს იყო ხელყუმბარის ტიპის სანთებელა, რომელიც ნებისმიერ მაღაზიაში შეგიძლიათ შეიძინოთ, ასევე, პისტოლეტი, რომელსაც "სტარტოვკას" ეძახიან, ხმოვანი პისტოლეტი მხოლოდ. ეს არ იყო ცეცხლსასროლი იარაღი არანაირად, შეიარაღებული არ ყოფილა, არავისზე ძალადობა არ მოუხდენია", — განაცხადა გიორგი ჭოჭუამ.

ბრალდებულის კიდევ ერთი ადვოკატი, ირმა ჭკადუა აღნიშნავს, რომ ამ ეტაპზე იარაღზე ექსპერტიზის დასკვნას ელოდებიან.

"ეს იყო სათამაშო სანთებელა, რომელსაც ხელყუმბარის ფორმა აქვს და მეტი დამაჯერებლობისთვის შეღება შავ ფერად. როგორც შეეძლო, ამ ქვეყნის მოქალაქემ, ამ ფორმით გააპროტესტა ის უსამართლობა, რაც ამ ქვეყანაში ხდება", — ამბობს ის ფორმულასთან.

20 ნოემბერს წერეთლის გამზირზე მიკროსაფინანსო ორგანიზაცია MBC-ში ერთი პირი შეიჭრა და მძევლები აიყვანა. შსს-ში აცხადებენ, რომ მას 17 ადამიანი ჰყავდა მძევლად.

რამდენიმესაათიანი სპეცოპერაციის შემდეგ ყველა მძევალი გათავისუფლდა, ხოლო თავდამსხმელი დააკავეს.

შენობიდან კადრები ინტერნეტში მალევე გავრცელდა. სავარაუდო თავდამსხმელი მძევლებს ეუბნება, რომ პირდაპირი ეთერი ჩართონ, რათა მედიებმა კადრები ნახონ და გააშუქონ. ის მოითხოვდა, რომ პარლამენტის დეპუტატები და ამ არჩევნებში მონაწილე პოლიტიკოსები შეკრებილიყვნენ და 3 კანონი მიეღოთ: აზარტული თამაშების აკრძალვა, სესხის პროცენტად მაქსიმუმ 7%-ის განსაზღვრა და წამლების ფასის შემცირება. გავრცელებულ კადრებში ის არ ასახელებს, რა შემთხვევაში გაათავისუფლებდა მძევლებს და არც მომლაპარაკებელს ითხოვდა.

გამოძიება ორზე მეტი პირის მძევლად ხელში ჩაგდებისა და ცეცხლსასროლი იარაღის მართლსაწინააღმდეგო შენახვა-ტარების მუხლებით მიმდინარეობს.