შინაგან საქმეთა სამინისტროს განცხადებით, თბილისში მიკროსაფინანსო ორგანიზაციაზე თავდასხმის საქმეზე დაკავებულ პირს ბრალი დაუმძიმდა. ამჟამად მას ორზე მეტი პირის მძევლად ხელში ჩაგდებას და ცეცხლსასროლი იარაღის მართლსაწინააღმდეგო შენახვა-ტარებას ედავებიან. მანამდე გამოძიება ყაჩაღობისა და იარაღის უკანონოდ ტარების მუხლებით დაიწყო.

დღეს, 20 ნოემბერს ერთი პირი წერეთლის გამზირზე მიკროსაფინანსო ორგანიზაცია MBC-ში შეიჭრა და მძევლები აიყვანა. შსს-ში აცხადებენ, რომ მას 17 ადამიანი ჰყავდა მძევლად.

რამდენიმესაათიანი სპეცოპერაციის შემდეგ ყველა მძევალი გათავისუფლდა, ხოლო თავდამსხმელი დააკავეს.

შენობიდან კადრები ინტერნეტში მალევე გავრცელდა. სავარაუდო თავდამსხმელი მძევლებს ეუბნება, რომ პირდაპირი ეთერი ჩართონ, რათა მედიებმა კადრები ნახონ და გააშუქონ. ის მოითხოვდა, რომ პარლამენტის დეპუტატები და ამ არჩევნებში მონაწილე პოლიტიკოსები შეკრებილიყვნენ და 3 კანონი მიეღოთ: აზარტული თამაშების აკრძალვა, სესხის პროცენტად მაქსიმუმ 7%-ის განსაზღვრა და წამლების ფასის შემცირება. გავრცელებულ კადრებში ის არ ასახელებს, რა შემთხვევაში გაათავისუფლებდა მძევლებს და არც მომლაპარაკებელს ითხოვდა.