"ჩვენც ამას მითხოვთ წლებია" — ასე ეხმაურება ლეიბორისტული პარტიის ლიდერი, შალვა ნათელაშვილი წერეთლის გამზირზე მიკროსაფინანსო ორგანიზაცია MBC-ზე სავარაუდო თავდამსხმელის განცხადებას. შენობიდან გავრცელებულ ვიდეოში ისმის, რომ კაცი აზარტული თამაშების აკრძალვას, ბანკებში 7%-იან სესხს და წამლებზე დაბალ ფასებს ითხოვს.

"ჩვენც ამას ვითხოვთ წლებია:

  1. აზარტული თამაშების აკრძალვას;
  2. ბანკებში სესხის წლიური მაქსიმალური ზღვარი 7 პროცენტი;
  3. პენსიონერებისთვის წამლები ხელმისაწვდომ ფასებში.

ხელისუფლებას მოვუწოდებ დააკმაყოფილოს მძარცველის მოთხოვნები", — წერს ნათელაშვილი ფეისბუქის ოფიციალურ გვერდზე.

ინტერნეტში წერეთელზე მიკროსაფინანსო ორგანიზაცია MBC-ზე სავარაუდო თავდამსხმელის კადრები ვრცელდება. ამ ეტაპზე შინაგან საქმეთა სამინისტრო არ ადასტურებს, რომ თავდამსხმელი ის არის. გავრცელებულ კადრებში ჩანს, რომ მძევლები დაშავებულები არ არიან და სავარაუდო თავდამსხმელი მათ მიმართ აგრესიას არ იჩენს. არ ჩანს აქვს თუ არა სავარაუდო თავდამსხმელს ცეცხლსასროლი იარაღი. სავარაუდოდ, მას ხელში ყუმბარა უჭირავს, თუმცა ამ ინფორმაციის დადასტურება ვერ ხერხდება.

სავარაუდო თავდამსხმელი მძევლებს ეუბნება, რომ პირდაპირი ეთერი ჩართონ, რათა მედიებმა კადრები ნახონ და გააშუქონ. ის მოითხოვს, პარლამენტის დეპუტატები და ამ არჩევნებში მონაწილე პოლიტიკოსები შეიკრიბონ და 3 კანონი მიიღონ: აზარტული თამაშების აკრძალვა, სესხის პროცენტად მაქსიმუმ 7%-ის განსაზღვრა და წამლების ფასის შემცირება. გავრცელებულ კადრებში ის არ ასახელებს, რა შემთხვევაში გაათავისუფლებს მძევლებს და არც მომლაპარაკებელს ითხოვს.

თბილისის პოლიციის უფროსის, ვაჟა სირაძის განცხადებით, წერეთელზე მიკროსაფინანსო ორგანიზაციაში შეჭრილია 1 პირი და მას 9 მძევალი ყავს. ამის შესახებ მან ადგილზე ჟურნალისტებთან განაცხადა.

"წერეთლის გამზირზე მოხდა შეიარაღებული თავდასხმა ერთ-ერთ მიკროსაფინანსო ორგანიზაციაში. ადგილზე იმყოფება პოლიციური ჯგუფები. ჩვენი ინფორმაციით, მიკროსაფინანსოში არის 9 მძევალი და 1 შეიარაღებული პირი", — განაცხადა მან.

მიკროსაფინანსო ორგანიზაცია MBC-ში, სადაც თავდამსხმელია შეჭრილი, აცხადებენ, რომ შესაძლებლობების ფარგლებში ყველაფერს გააკეთებენ, პროცესის მშვიდობიანად დასასრულებლად.