გენერალური პროკურორობის კანდიდატი და ყოფილი გენერალური პროკურორი, ირაკლი შოთაძე პროკურატურის საქმიანობაზე გადაცემების მომზადებას გეგმავს. მისი თქმით, გადაცემების მიზანი საზოგადოების სამართლებრივი ცნობიერების ამაღლება იქნება. ამის შესახებ შოთაძემ საპროკურორო საბჭოში გასაუბრების დროს ისაუბრა.

როგორც შოთაძე ამბობს, გადაცემებიდან მიღებული ცოდნა საზოგადოებას დაეხმარება, რომ მიმდინარე პროცესების კინოებსა და სერიალებში ნანახ რომანტიზირებულ რეალობასთან აღრევა არ მოხდეს.

"ვფიქრობ, რომ პროკურატურისთვის ერთ-ერთი მნიშვნელოვანი გამოწვევა არის საზოგადოებისთვის ნდობის ამაღლება. ზოგადად, საზოგადოების დამოკიდებულებას განაპირობებს ის მძიმე მემკვიდრეობა, რომელიც დღევანდელ სისტემას მოჰყვება წარსულიდან. მე ვფიქრობ, რომ საჭიროა გარკვეული ნოვატორული მიდგომის დანერგვა. საჭიროა საზოგადოებასთან მეტი კომუნიკაცია, რათა ყველას დავანახოთ ის მნიშვნელოვანი როლი, რაც პროკურატურას აკისრია. ამ მიმართულებით ინტენსიურად უნდა ჩატარდეს სხვადასხვა საგანმანათლებლო ღონისძიებები. ასევე ვფიქრობ, მოსამზადებელი იქნება გადაცემათა სერიები, რომელსაც ექნება საგანმანათლებლო ხასიათი", — განაცხადა ირაკლი შოთაძემ.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა. გენერალური პროკურორობა 16 კანდიდატს სურს.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო.

არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.