თბილისის ცენტრალურ უნბნებსა და ქალაქის შემოგარენში, სკვერებსა და პარკებში 80 ათასი ხე-მცენარის დარგვა იგეგმება. ამის შესახებ დღეს მთავრობის სხდომაზე თბილისის მერმა, დავით ნარმანიამ განაცხადა. მერიის პრესსამსახურის ცნობით, აღნიშნული პროცესი მიმდინარე კვირაში დაიწყება - დაირგვება დიდი ზომის ხეები და დაიწყება დაზიანებული კორომების აღდგენა.

ნარმანიას თქმით, ვერეს ხეობაში დარგული ხეების 90-მა პროცენტმა გაიხარა, ხოლო გამხმარ 10 პროცენტს კონტრაქტორი კომპანია ნოემბრის პირველ ნახევარში ჩაანაცვლებს:

„ვერეს ხეობაში, სადაც ჩვენ დიდი ზომის 4 700 ერთეული ხე დავრგეთ, დიდმა ნაწილმა გაიხარა. დარგის სპეციალისტები ვარაუდობდნენ, რომ დარგული ხეების, დაახლოებით, 80% გაიხარებდა. თუმცა, ჩვენ გვაქვს გაცილებით უკეთესი სურათი - უპრეცედენტო მოვლის პირობებში, გაიხარა დარგული მცენარეების, თითქმის, 90-მა პროცენტმა. ნერგებს, რომლებიც გახმა, კონტრაქტორი კომპანია ნოემბრის პირველ ნახევარში ჩაანაცვლებს.“