თბილისის მერიის ჯანდაცვისა და სოციალური მომსახურების საქალაქო სამსახურმა ანგარიში წარადგინა, რომლის თანახმადაც აღნიშნულმა ორგანომ 2016 წლის პირველ კვარტალში ჯანდაცვისა და სოციალური მომსახურების 31 პროგრამას გაუწია ადმინისტრირება, რომელთა განსახორციელებლადაც ბიუჯეტიდან 30 მლნ ლარი დაიხაჯრა.

მერიის ინფორმაციით, წელს ჯანდაცვის მიმართულებით 3 ახალი პროგრამა ამოქმედდა: ორთოპედიულ დაავადებათა სკრინინგი, ფსიქიკური ჯანმრთელობის სათემო მომსახურება და ძუძუს კიბოს ადრეული სტადიის მკურნალობის დაფინანსების ქვეპროგრამა, რომლის ფარგლებშიც 36 პაციენტი ძვირადღირებული პრეპარატი-ჰერცეპტინით უზრუნველყვეს.

მერიის ცნობით, აღნიშნულ პერიოდში აუტიზმის სპექტრის დარღვევის მქონე 386 ბავშვს აღდგენითი თერაპიის 20 ინდივიდუალური სეანსი ჩაუტარეს, C ჰეპატიტის კვლევით 4428 პაციენტი უზრუნველყვეს, 40 წლამდე პაციენტებში ძვლის ტვინის ტრანსპლანტაციის ქვეპროგრამის ფარგლებში 5 პაციენტი დააფინანსეს (2 ტრანსპლანტაცია, 3 კვლევა), 13 ათას ბავშვსა და მოზარდს კი სქოლიოზისა და ბრტყელტერფიანობის სკრინინგი ჩაუტარეს.

გარდა ზემოაღნიშნულისა, სხვა პროგრამების შესრულების მაჩვენებელი შემდეგია:

• ძუძუს, საშვილოსნოს, კოლორექტული და პროსტატის კიბოს სკრინინგი ჩაიტარა 11 ათასზე მეტმა პირმა.
• გადამდებ და არაგადამდებ დაავადებათა ეპიდემიოლოგიური კონტროლის დაფინანსების ქვეპროგრამის ფარგლებში, 67 784 შემთხვევა დაფიქსირდა, აქედან 66 534 გრიპსა და გრიპის მსგავს ინფექციებზე მოდის.
• ნარკომანიის ჩანაცვლებითი თერაპიის ქვეპროგრამით ყოველთვიურად სარგებლობს არაუმეტეს 265 ბენეფიციარისა.

სოციალური მიმართულებით განხორციელებულ ქვეპროგრამების სია ასეთია:

• სოციალურად დაუცველ ოჯახებში ყველა ახალშობილზე ერთჯერადი დახმარების ქვეპროგრამით 500 ლარიანი დახმარება 277-მა ბავშვმა მიიღო.

• შშმ პირთა საზოგადოებაში ინტეგრაციის ხელშეწყობის ქვეპროგრამის ფარგლებში 14 პროექტი დაფინანსდა.

• 100 წელს მიღწეულ მოქალაქეთათვის ერთჯერადი დახმარების ქვეპროგრამის ფარგლებში 1000 ლარიანი დახმარება 20-მა ხანდაზმულმა მიიღო.

• სოციალურად დაუცველი ოჯახებისთვის მე-3, მე-4, მე-5 და მეტი შვილის დაბადებისთვის ერთჯერადი მატერიალური დახმარების ქვეპროგრამის ფარგლებში, შესაბამისად 800, 1000 და 1500 ლარით 80 ბენეფიციარი დაფინანსდა.

• სოციალურად დაუცველი მრავალშვილიანი ოჯახების 18 წლამდე ასაკის თითოეულ ბავშვზე დახმარების ქვეპროგრამის ფარგლებში ყოველთვიური 50 ლარიანი დახმარება საშუალოდ 12 200-მა ბავშვმა მიიღო.

• სოციალურად დაუცველ ოჯახებში მცხოვრები ბავშვების მოსწავლე-ახალგაზრდობის სახლებში სწავლების დაფინანსების ქვეპროგრამით საშუალოდ 1 900 ბავშვი დააფინანსეს.

• სოციალურად დაუცველ ოჯახებში მცხოვრები ბავშვების ხელოვნების სკოლებში სწავლების დაფინანსების ქვეპროგრამით საშუალოდ 2 500 ბავშვი დააფინანსეს.

• სოციალურად დაუცველ ოჯახებში მცხოვრები ბავშვების სპორტულ სკოლებსა და საცურაო აუზებში სწავლების ქვეპროგრამით საშუალოდ 1 380 ბავშვი დააფინანსეს.

• შინმოვლის თანადაფინანსების ქვეპროგრამის ბენეფიციარი საშუალოდ 800 პირი იყო.

• კომუნალური სუბსიდირების პროგრამით ელ.ენერგიის გადასახადის სუბსიდია 391 350-მა მომხმარებელმა/აბონენტმა მიიღო, დასუფთავების-318 ათასამდე აბონენტმა, ხოლო წყლის-331 ათასზე მეტმა აბონენტმა, რასაც საშუალოდ 34 679 აბონენტისთვის ფულადი ნაწილის დარიცხვა დაემატა.

• სერვისცენტრებში სამგზავრო ბარათების დამზადება (ინიციალიზაციის) ქვეპროგრამის ფარგლებში სხვადასხვა კატეგორიის მომხმარებელზე დაახლოებით 18 ათასი ბარათი გაიცა.

• სამედიცინო და სხვა სოციალური საჭიროებების დახმარების ღონისძიებების ქვეპროგრამის ფარგლებში, 2016 წლის პირველ კვარტალში, 3 864 135 ლარი გაიცა, აქედან, საქართველოში სამკურნალოდ 3 491 195, ხოლო საზღვარგარეთ - 372 940 ლარი. სულ, შემოვიდა 8 127 განაცხადი, საიდანაც 8 049 ნაწილობრივ ან სრულად დაფინანსდა.