საზოგადოებრივი მაუწყებლის მედია წარმოების დირექტორმა, სერგი გვარჯალაძემ, საერთაშორისო გამჭვირვალობა საქართველოს მიერ ჩატარებული კვლევის პრეზენტაციაზე, საერთო ეგზიტპოლებთან დაკავშირებული კრიტიკის მოსმენის შემდეგ, აღნიშნა, რომ ვერ დაეთანხმება არასამთავრობო ორგანიზაციების კრიტიკას.

მისი განცხადებით ხმაური იმასთან დაკავშირებით, რომ კვლევის ჩამტარებელი ორგანიზაციის სანდოობა კითხვის ნიშნის ქვეშ დგას უსაფუძვლოა. მან აღნიშნა, რომ თი-ენ-ესი კვალიფიცირებული ორგანიზაციაა, რომელსაც საერთაშორისო დონეზე არაერთი პოლიტიკური კვლევა აქვს ჩატარებული და არასდროს ჰქონიათ შეცდომა ციფრებთან მიმართებაში.

მას შემდეგ, რაც საზოგადოებრივმა მაუწყებელმა გამოთქვა სურვილი კომერციულ ტელეკომპანიებთან ერთად კვლევა ჩაეტარებინა, არასამთავრობო ორგანიზაციებმა მოუწოდეს საზოგადოებრივი მაუწყებლის სამეურვეო საბჭოსა და მენეჯმენტს თავი შეეკავებინა ისეთი პროექტების განხორციელებისგან, რომლებიც მაუწყებლის მიუკერძოებლობას ეჭვქვეშ დააყენებდა.

სერგი გვარჯალაძემ ისაუბრა მიზეზებზე, რის გამოც მაუწყებელმა გადაწყვიტა საერთო ეგზიტპოლის ჩატარება. მან აღნიშნა, რომ არჩევნების დღე ტელევიზიისთვის მნიშვნელოვანი დღეა და მაუწყებელმა გამოიყენა შანსი იაფად, თანხის დაზოგვით მიეღო კვალიფიციური ციფრები და გაეკეთებინა კარგი, რეიტინგული გადაცემები.

კითხვაზე, თუ რა გარანტია აქვს მაუწყებელს, რომ მაყურებელი ამ კვლევას მათ გადაცემაში იხილავს და არა იმ ტელევიზიებში, რომელთაც უფრო მაღალი რეიტინგი აქვთ, სერგი გვარჯალაძემ უპასუხა, რომ მათი პასუხისმგებლობაა ეს თემა დაბალანსებულად, ხარისხიანად და სიღრმისეულად გააშუქონ და ამით მიიღონ გარანტია, რომ მაყურებელი ეყოლებათ:

"კვლევის მონაწილე სხვა კომერციული არხები სხვა ასპექტებზე გააკეთებენ აქცენტს. ჩვენი აქცენტი კი გაკეთდება იმაზე, რომ სიღრმისეულად მივაწოდოთ მაყურებელს ინფორმაცია"

ამასთან დაკავშირებით საზოგადოებრივი მაუწყებლის პროფკავშირების წარმომადგენლებმა აღნიშნეს, რომ ეს არ იქნება ექსკლუზივი და კომერციულ ტელევიზიებთან ერთად ჩატარებული ეგზიტპოლი დააზიანებს მაყურებლის ნდობას. მათ აღნიშნეს, რომ არ შეაქვთ ეჭვი კვლევის შედეგების სანდოობაში, მაგრამ ეს თანხა არამიზნობრივად დახარჯულად მიაჩნიათ.

"როცა რვაზე ქრონიკაც გავა და მოამბეც, რა თქმა უნდა, ძირითადი მაყურებელი ეყოლება ქრონიკას. ეს ფული იქნება აბსოლუტურად უქმად დახარჯული. ამავდროულად იქნება იმიჯისთვის საზიანო და ჩვენ ნეიტრალური სივრცის პერსპექტივას მოვუსპობთ საზოგადოებრივ მაუწყებელს".

პროფკავშირების წარმომადგენლების განცხადებით მაუწყებლის მენეჯმენტისგან უფრო სწორი გადაწყვეტილება იქნებოდა ეს თანხა ახალი ნიუსრუმის მშენებლობას მოხმარებოდა.

ეგზიტპოლებს კვლევითი კომპანიები თი-ენ-ესი და გორბი ატარებს. 4 მაუწყებლის მიერ დაკვეთილი ეგზიტპოლის შედეგები როგორც პროპორციულ, ასევე მაჟორიტარულ ოლქებთან დაკავშირებით, 8 ოქტომბერს, 8 საათზე, არჩევნების დასრულებისთანავე გამოქვეყნდება.

დღეს, საერთაშორისო გამჭვირვალობა საქართველომ საზოგადოებრივ მაუწყებელში შრომითი გარემოს კვლევის შედეგები წარადგინა.

პრეზენტაციას ესწრებოდნენ არასამთავრობო ორგანიზაციების, საზმაუს მენეჯმენტის და პროფკავშირის წარმომადგენლები. პრეზენტაციის შემდეგ გაიმართა დისკუსია, სადაც ერთ-ერთ მთავარ პრობლემად საზოგადოებრივი მაუწყებლის მიერ კომერციულ ტელეკომპანიებთან იმედი, მაესტრო და GDS საარჩევნო ეგზიტპოლის ჩატარება გამოიკვეთა.