უკრაინის მართლმადიდებელი ეკლესიის საპატიო პატრიარქი, ფილარეტი ტომოსის მიღებაზე უარს ამბობს. მისივე თქმით, ტომოსის მიღებამდე მისი შინაარსის შესახებ არაფერი იყო ცნობილი.

"ჩვენ რომ შინაარსი გვცოდნოდა, 15 დეკემბერს ავტოკეფალიის სასარგებლოდ ხმას არ მივცემდით, რადგან ჩვენ არ გვჭირდება ერთი დამოკიდებულებიდან მეორე დამოკიდებულებაში გადასვლა. მოსკოვის საპატრიარქო ემსახურება მოსკოვის ინტერესებს, უკრაინის მართლმადიდებელი ეკლესია — ბერძნების. და ვინ მოემსახურება უკრაინას?" — განაცხადა ფილარეტმა.

მიმდინარე წლის 6 იანვარს სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს ტომოსი ანუ ბრძანება გადასცა. ამით, უკრაინის ეკლესია ოფიციალურად გამოეყო რუსეთის ეკლესიას და ფორმალურად გაფორმდა ოქტომბერში მიღწეული შეთანხმება, ავტოკეფალიის მინიჭებაზე.

15 მაისს ფილარეტმა განაცხადა, რომ უკრაინის უკვე ყოფილმა პრეზიდენტმა, პეტრო პოროშენკომ და უკრაინის მართლმადიდებელი ეკლესიის წინამძღოლმა, მიტროპოლიტმა ეპიფანემ მოატყუეს, რადგან შეთანხმების პირობები დაარღვიეს. ფილარეტის მტკიცებით, ავტოკეფალიის გამოცხადების შემდეგ ქვეყნის შიგნით ეკლესია მას უნდა ემართა და ეკლესიის სახელწოდება უკრაინის მართლმადიდებელი ეკლესიის კიევის საპატრიარქო უნდა ყოფილიყო, საზღვარგარეთ კი ეკლესია ეპიფანეს უნდა წარედგინა.

გარდა ამისა, ფილარეტმა ერთ-ერთ ინტერვიუში განაცხადა, რომ ტომოსის სამი პუნქტი მისთვის მიუღებელია. საპატიო პატრიარქის თქმით, ტომოსი უკრაინელებს, როგორც კიევის საპატრიარქოს მრევლს არ განსაზღვრავს. მეორე საკითხი, რომელიც ფილარეტს ტომოსის ტექსტში არ მოსწონს, მირონის დამზადებას ეხება. ტომოსით უკრაინის მართლმადიდებელ ეკლესიას მირონის დამზადება ეზღუდება. მესამე შეზღუდვად ფილარეტი კონფლიქტების დარეგულირებას მიიჩნევს: თუ უკრაინის მართლმადიდებელ ეკლესიაში კონფლიქტი გაჩნდება, მას კონსტანტინოპოლის საპატრიარქო გადაწყვეტს. ფილარეტის თქმით, არც ერთ ავტოკეფალურ ეკლესიას, რომელმაც ტომოსი მიიღო, მსგავსი პუნქტები არ აქვს.