ბავშვის უფლებების კოდექსს საქართველოს ადამიანის უფლებათა კომიტეტში პირველი მოსმენით განიხილავენ. განხილვას დეპუტატების გარდა ესწრებიან ბავშვის უფლებებზე მომუშავე ორგანიზაციები, მმკ-ს წევრები, სასულიერო პირები და მოსწავლეები.

კანონპროექტის ერთ-ერთი ავტორის სოფო კილაძის თქმით, საზოგადოების ნაწილმა სცადა, რომ ანტიეროვნულობის იარლიყი მიეწებებინა კანონპროექტისთვის, მაგრამ არ გამოუვიდა.

"ძალიან ვამაყობ იმით, რომ საკანონმდებლო ისტორიაში პირველად შემოგვაქვს კანონმდებლობის დონეზე სიტყვა სამშობლო და ის, რომ ჩვენი შვილები ჩვენი სამშობლოს, მისი ენის, ჩვენი კულტურული ტრადიციების სიყვარულით აღვზარდოთ. გარკვეულმა ვიწრო ჯგუფი შეეცადა საზოგადოებისთვის არასწორად მიეწოდებინა ინფორმაცია და ანტიეროვნულობის იარლიყი მიეწებებინა ამ კოდექსისთვის, თუმცა მზად ვარ თითოეულ შეკითხვას ვუპასუხო და როდესაც გავიარე კონსულტაციები, მათ შორის ეკლესიის ნაწილთან ვისაც ჰქონდა გარკვეული შეშფოთება არასწორი ინფორმაციის გამო, მიხვდნენ, რომ არაფერი სადავო არ არის", — განაცხადა სოფო კილაძემ.

ცვლილების შედეგად კოდექსის სამუშაო ვერსიის 36-ე მუხლის "გ" ქვეპუნქტი ასე ჩამოყალიბდა: "სამშობლოს, მისი მშობლიური ენის, მშობლიური ქვეყნის ტრადიციული კულტურული ღირებულებების და განსხვავებული კულტურის და ცივილიზაციების პატივისცემის გრძნობის განვითარება".