უკრაინის ავტოკეფალიის აღიარების საპასუხოდ, რუსეთის მართლმადიდებელმა ეკლესიამ კონსტანტინოპოლის ეკლესიასთან ევქარისტული კავშირი სრულად გაწყვიტა. როგორც რუსული ეკლესიის წარმომადგენელმა მიტროპოლიტმა, ილარიონ ვოლოკოლამსკიმ განაცხადა ეს იძულებითი გადაწყვეტილება იყო.

"ჩვენს წმინდა სინოდს სხვა გადაწყვეტილების მიღება არ შეეძლო. ეს კონსტანტინოპოლის პატრიარქის ქმედებებმა გამოიწვია", — განაცხადა მიტროპოლიტმა. ვოლოკოლამკის თქმით, იმედი აქვთ კონსტანტინოპოლი შეცვლის თავის გადაწყვეტილებას.

11 ოქტომბერს ცნობილი გახდა, რომ კონსტანტინოპოლის წმინდა სინოდმა უკრაინის ეკლესიის ავტოკეფალიის მინიჭების პროცესი დაიწყო. სინოდის განცხადების თანახმად, გაუქმდა 1686 წელს სინოდის მიერ მიღებული გადაწყვეტილება, რომელიც მოსკოვის საპატრიარქოს ნებას რთავდა კიევის სამიტროპოლია საკუთარ დაქვემდებარებაში მოექცია.

კიევის პატრიარქმა ფილარეტმა განაცხადა, რომ ავტოკეფალიის საკითხში საქართველოს მართლმადიდებელი ეკლესიის საპატრიარქოს მხარდაჭერის იმედი აქვს. თუმცა, საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდება.