ოკუპირებული ტერიტორიების აღიარების გამო საქართველომ სირიის ავიაკომპანიებს საჰაერო სივრცე დაუხურა. როგორც On.ge-ს საქაერონავიგაციის პრესსამსახურმა უთხრა, სირიის ავიაკომპანიები საქართველოს საჰაერო სივრცით პირველი ივნისიდან აღარ სარგებლობენ.

მიმდინარე წლის 29 მაისს, სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდბელ რესპუბლიკებად აღიარა. პასუხად საქართველოს საგარეო საქმეთა სამინისტრომ სირიასთან დიპლომატიური ურთიერთობები გაწყვიტა.

საქართველოს საჰაერო სივრცეს მხოლოდ ორი სირიული კომპანია იყენებდა: Syrian Air და Cham Wings. მხოლოდ ეს ავიაკომპანიებია, რომლებიც სირიიდან რუსეთის მიმართულებით პირდაპირ რეისებს ახორციელებენ. Reuters-ის ინფორმაციით, ახლა რუსეთის მიმართულებით ფრენები აზერბაიჯანის გავლით ხორციელდება, რითაც მგზავრობა ნახევარი საათით გახანგრძლივდა.

ავიაკომპანიებისთვის საჰაერო სივრცის დახურვის შესახებ ინფორმაცია როიტერსს საქაერონავიგაციის ხელმძღვანელმა, გოჩა მეზვრიშვილმაც დაუდასტურა. მისი თქმით, მან ევროპის საჰაერო ნავიგაციის უსაფრთხოების ორგანიზაციას მისწერა, რათა Syrian Air-სა და Cham Wings-ს საქართველოს საჰაერო სივრცე აღარ გამოეყენებინათ.

როიტერსის გამოძიებით, Cham Wings-ს სირიაში რუსი სამხედრო კონტრაქტორები გადაჰყავდა, რათა მათ ასადის რეჟიმის მხარეს ებრძოლათ.