პროკურატურამ ტელეწამყვან ინგა გრიგოლიას მიმართ ადევნებისა და მუქარის საქმეზე დღეს, 22 მაისს რ.ნ.-ს ბრალდება წარუდგინა, სისხლის სამართლის კოდექსის 1511-ე მუხლის 1-ლი ნაწილით და 151-ე მუხლის 1-ლი ნაწილით.

გამოძიებით დადგინდა, რომ ბრალდებულმა ინგა გგოლიასთან, მისთვის არასასურველი კომუნიკაცია დაამყარა, დაადგინა მისი მობილური ტელეფონის ნომერი, სამსახურის მისამართი და დაუწყო უკანონო თვალთვალი. გამოძიების ინფორმაციით, ბრალდებული სისტემატიურად ურეკავდა ტელეფონზე, სთხოვდა შეხვედრას, აკითხავდა სამსახურთან და საცხოვრებელ სახლთან, უგზავნიდა მოკლე ტექსტურ შეტყობინებებს და ხელნაწერ წერილებს, სთხოვდა თითქოსდა საერთო შვილის ჩვენებასა და ვითომდა მითვისებული ქონების დაბრუნებას.

პროკურატურის ცნობით, დაკავებული ტელეწამყვანზე სისტემატიურ ფსიქოლოგიურ ზეწოლას ახორციელებდა, ემუქრებოდა ჯანმრთელობისა და ქონების დაზიანებით.

სამართალდამცველებმა რ.ნ. 2018 წლის 21 მაისს თბილისში დააკავეს. ბრალდების მხარემ უკვე მიმართა თბილისის საქალაქო სასამართლოს ბრალდებულის მიმართ აღკვეთი ღონისძიების სახით პატიმრობის გამოყენების მოთხოვნით.

წარდგენილი ბრალდება სასჯელის სახედ და ზომად 2 წლამდე თავისუფლების აღკვეთას ითვალისწინებს.