საქართველოს აერონავიგაციის 25 წლის იუბილეზე, თბილისში საქაერონავიგაციის საჰაერო მოძრაობის მართვის ახალი შენობა და სასწავლო ცენტრი გაიხსნა.

საჰაერო მოძრაობის ახალი ცენტრი საქართველოს პრემიერ-მინისტრმა გიორგი კვირიკაშვილმა გახსნა.

მისი განცხადებით, დღევანდელი დღე არის კიდევ ერთი წინგადადგმული ნაბიჯი საქართველოში ფრენის უსაფრთხოების დონის ასამაღლებლად და საჰაერო ინდუსტრიის განსავითარებლად, რაც პირდაპირ უკავშირდება ქვეყანაში ავიაციის, ტურიზმის და, ზოგადად, ეკონომიკის განვითარებას.

"ქვეყნისთვის, რომელიც თავისი პოლიტიკით ყალიბდება, როგორც სატრანზიტო ჰაბი, პრინციპულად მნიშვნელოვანია, რომ პარტნიორი ქვეყნებისთვის მიმზიდველები გავხდეთ საჰაერო ტრანსპორტის კუთხითაც. მოგეხსენებათ, ევროპის საჰაერო საზღვრები 2014 წლიდან უკვე საქართველოდან იწყება. ჩვენი ქვეყანა აზია - ევროპის საზღვარია ჰაერში, "საქაერონავიგაცია" კი - ევროპის მესაზღვრე გახლავთ და სასიხარულოა, რომ ამ საპასუხისმგებლო მისიას ის მართლაც უმაღლესი სტანდარტებით ასრულებს", - განაცხადა საქართველოს პრემიერ-მინისტრმა სიტყვით გამოსვლისას.

მისი თქმით, გზა ევროპისკენ და ევროპის საავიაციო სივრცისკენ მუდმივ განვითარებაზე გადის.

"საქართველო არის ქვეყანა, რომელიც ხმელეთის მსგავსად, ჰაერითაც შეძლებს, აზია და ევროპა უმოკლესი მარშრუტების საშუალებით დააკავშიროს ერთმანეთთან. უმოკლესი საჰაერო გზები ავიაკომპანიებს მისცემს შესაძლებლობას, ფრენების მარშრუტის დადგენისას უმოკლესი მანძილი აირჩიონ, რაც ფრენის დროის შემცირებასთან ერთად, საოპერაციო ხარჯების და ეკოლოგიაზე ნეგატიური ზემოქმედების შემცირებასაც გულისხმობს", - განაცხადა პრემიერმა.

გახსნის ცერემონიას საქართველოს პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი, სამოქალაქო ავიაციის საერთაშორისო ორგანიზაციის (ICAO) რეგიონალური დირექტორი ლუის ფონსეკა ალმეიდა, ევროკონტროლის დირექტორი ეამონ ბრენანი, ესპანური კომპანია კომპანია INDRA-ს პრეზიდენტი ფედერიკო რუედა, სამოქალაქო ავიაციისა და სხვა სახელმწიფო უწყებების წარმომადგენლები დაესწრნენ.