დღეს, 27 აპრილს ჩრდილოეთ კორეისა და სამხრეთ კორეის ლიდერებს შორის ისტორიული სამიტი გაიმართა. 65 წლის განმავლობაში ეს პირველი შემთხვევა იყო, როდესაც ჩრდილოეთ კორეის ლიდერმა სამხრეთ კორეის ტერიტორიაზე ფეხი დაადგა.

სამიტის შეხვედრა დახურულ კარს მიღმა ჩატარდა და სულ ექვსი ადამიანი ესწრებოდა. ისტორიული მოლაპარაკებების მაგიდასთან ექვს დელეგატს შორის ერთადერთი ქალი იყო - კიმ ჩენ ინის და, კიმ იო ჯონგი.

კიმ იო ჯონგი სამხრეთ კორეაში პირველად ზამთრის ოლიმპიადისას ჩავიდა და ჩრდილოეთ კორეის ოფიციალურ დელეგაციას უხელმძღვანელა. შეხვედრის განმავლობაში კიმ იო ჯონგი ძმის გვერდით იჯდა და ბლოკნოტში ჩანაწერებს აკეთებდა.

სამიტზე კიმ ჩენ ინის გვერდით ზის მისი და, კიმ იო ჯონგი

ფოტო: Pool / Getty Images

სწორედ კიმ იო ჯონგი იყო ჩრდილოეთ კორეის მმართველი დინასტიის პირველი წარმომადგენელი, რომელმაც 1953 წელს, კორეის გაყოფის შემდეგ სამხრეთ კორეის ტერიტორიაზე ჩავიდა. ორ ერს შორის აღდგენილი ურთიერთობის ნიშნად, კიმ ჩენ ინმა დის ხელით სამხრეთ კორეის პრეზიდენტ მუნ ჯეი ინს წერილი გადასცა.

კიმ იო ჯონგი თავისი ძმის გვერდით აქტიურად 2014 წლიდან ჩნდება. მაშინ მან მუშათა პარტიის პროპაგანდისა და აგიტაციის დეპარტამენტის დირექტორის თანამდებობა დაიკავა. ოფიციალური სეულის ინფორმაციით, სავარაუდოდ, სწორედ ამ პერიოდში, ჩრდილოეთ კორეის ლიდერის ავადმყოფობის გამო, კიმ იო ჯონგი ქვეყანას დროებით მართავდა.

თუმცა იქიდან გამომდინარე, რომ კიმების ოჯახი მთლიანად ბურუსით არის მოცული, საზოგადოებისთვის მის შესახებ ბევრი რამ არ არის ცნობილი.

კიმ იო ჯონგი ხელს ართმევს სამხრეთ კორეის პრეზიდენტს, მუნ ჯეი ინს

ფოტო: EPA

კიმ იო ჯონგი დაიბადა 1987 წელს და ძმასთან ერთად უმაღლესი განათლება შვეიცარიაში მიიღო. სამშობლოში დაბრუნების შემდეგ სამხედრო სასწავლებელში გააგრძელა სწავლა.

ვარაუდობენ, რომ ჩრდილოეთ კორეის ყოფილი ლიდერის, კიმ ჩენ ირისადა შვიდი შვილიდან კიმ იო ჯონგი უმცროსია. ცნობილია ის, რომ კიმ ჩენ ინსა და კიმ იო ჯონგს საერთო დედა ჰყავთ.

კიმ იო ჯონგის პოლიტიკურ ძალაუფლებაზე საუბრობს ისიც, რომ ის ხშირად დაჰყევბა კიმ ჩე ინს შეხვედრებზე და, როგორც ამბობენ, ძმის შეხვედრებსა და მგზავრობებს გეგმავს.

გაიგეთ მეტი: