ჰოლივუდის ყოფილ პროდიუსერს, ჰარვი ვაინშტაინს, ახალი კომუნიკაციების ჯგუფი ჰყავს. მას ახლა ნიუ-იორკში მდებარე კომპანია Herald PR წარმოადგენს.

ვაინშტაინი აღარ თანამშრომლობს Sitrick And Company-სთან, რომელიც კრიზისული სიტუაციების მოგვარებაშია სპეციალიზირებული. კომპანიამ ინფორმაცია CNN-თან დაადასტურა, თუმცა მიზეზების განმარტებისგან თავი შეიკავა.

Sitrick And Company-მ ვაინშტაინისთვის მუშაობა 2017 წლის ოქტომბერში დაიწყო, როცა The New York Times-მა და The New Yorker-მა პირველად დაწერეს იმ ქალების ისტორიები, რომლებიც ჰარვი ვაინშტაინს სექსუალურ შევიწროებაში ადანაშაულებდნენ.

ვაინშტაინის საქმე ჰოლივუდის ერთ-ერთი უდიდესი სკანდალია. 90-ზე მეტმა ქალმა დაადანაშაულა სექსუალურ შევიწროებაში, თავდასხმასა და გაუპატიურებაში. მის საქმეს ლოს-ანჯელესის, ბევრლი ჰილზის, ნიუ-იორკისა და ლონდონის პოლიცია იძიებს.

თავად ვაინშტაინი უარყოფს, რომ ქალებთან სექსუალური ურთიერთობა მათი სურვილის საწინააღმდეგოდ ჰქონდა.