ადამიანის უფლებების სწავლებისა და მონიტორინგის ცენტრი მიიჩნევს, რომ უწყებათაშორისი კომისიის მიერ მხარდაჭერილი კანონპროექტით ნარკოპოლიტიკის ფუნდამენტური ცვლილება ვერ მოხდება. ორგანიზაციაში განმარტავენ, რომ ეს კანონპროექტი ნარკოპოლიტიკის ეროვნული პლატფორმისა და პარლამენტის ჯანდაცვის კომიტეტის მიერ მომზადებული დოკუმენტისგან "რადიკალურად განსხვავებულია".

ორგანიზაციის განმარტებით, პროკურატურის მომზადებული კანონპროექტი შეეხება ნარკოტიკული ნივთიერების დოზების ცვლილებას იმ მიზნით, რომ ცარიელი/მოხმარებული შპრიცის გამო ადამიანები წლობით ციხეში არ მიდიოდნენ. ორგანიზაციას მიაჩნია, რომ ახალი კანონპროექტით არსებული ნარკოპოლიტიკის ფუნდამენტური ცვლილება ვერ მოხდება.

"კანონპროექტი ასწორებს მხოლოდ ერთ ანომალიას, რაც ქართულ ნარკოპოლიტიკას ახასიათებს, თუმცა უგულებელყოფს მთელ რიგ უსამართლობებს და სისტემურ პრობლემებს არსებულ ნარკოპოლიტიკაში. სამწუხაროა, რომ უწყებათაშორისი საბჭოს წევრები დაეთანხმნენ საკანონმდებლო ცვლილებების ფრაგმენტულად განხორციელებას", - ნათქვამია განცხადებაში.

EMC-ის განმარტებით, ხელისუფლება მუშაობას გააგრძელებს დავიწროებულ, ფრაგმენტულ კანონპროექტზე, რომელიც პირადი მოხმარების მიზნით ნარკოტიკული საშუალების ფლობისთვის ადამიანის დაპატიმრებას შესაძლებელს ტოვებს:

"ხელისუფლების ეს გადაწყვეტილება, პირველ რიგში, აჩვენებს სრულიად არაჯანსაღ დამოკიდებულებას იმ პროცესის მიმართ, რომელშიც ჩვენ სახელმწიფო უწყებებთან ერთად არაერთი თვის განმავლობაში ვიყავით და შრომა გავწიეთ იმისთვის, რომ კონსენსუსი მიღწეული ყოფილიყო".

ორგანიზაციის განცხადებით, როცა პარლამენტში კანონპროექტის განხილვა უნდა დაწყებულიყო, ხელისუფლების მხრიდან სტრატეგიის ცალმხრივად ცვლილება და პროცესში ჩართული არაერთი ჯგუფის მოთხოვნის იგნორირება, პროცესის ლეგიტიმურობას საეჭვოს ხდის.

"სამართალდამცავების მიერ შემოთავაზებული ხედვა უგულებელყოფს მოქალაქეთა მრავალწლიან და სამართლიან მოთხოვნას, ფუნდამენტურად შეცვლილიყო სადამსჯელო, რეპრესიაზე დამყარებული ნარკოპოლიტიკა ქვეყანაში".

ახალ კანონპროექტს მხოლოდ ძველი კანონპროექტის ინიციატორებმა არ დაუჭირეს მხარი.

ნარკოპოლიტიკის რეფორმა

ნარკოპოლიტიკის რეფორმის კანონპროექტი პარლამენტში, თითქმის, 10 თვის წინ დარეგისტრირდა. 5 მარტს რეფორმის განხილვა პარლამენტში ორი თვით გადაიდო. გადაწყვეტილება დეპუტატებმა ბიუროს სხდომაზე მიიღეს.

ჯანდაცვის კომიტეტის თავმდჯომარემ, აკაკი ზოიძემ On.ge-ს უთხრა, რომ დეპუტატების მხარდაჭერის გარეშე განხილვას აზრი არ აქვს.