American Idol-ის მონაწილე 19 წლის ბენჯამინ გლეიზი უკმაყოფილოა, რომ კეტი პერიმ მას ტუჩებში აკოცა.

ქასთინგზე მან თქვა, რომ მოლარედ მუშაობს, რადგან ასე "საყვარელ გოგოებთან" შეხვედრის საშუალება აქვს. ამის შემდეგ, მას ჟიურის წევრმა ლუკ ბრაიანმა ჰკითხა, თუ უკოცნია გოგოსთვის და თუ მოსწონებია ეს [ამით მან კეტი პერის სიმღერის ტექსტი გაათამაშა "I kissed a girl and I liked it"].

"არასდროს ვყოფილვარ შეყვარებული და თუ გოგო არ მიყვარს, მას ვერ ვაკოცებ", - უპასუხა ბენჯამინმა.

როცა პერიმ ბენჯამინის სიტყვები გაიგო, მას დაუძახა: "მოდი აქ, მოდი აქ ახლავე".

თავდაპირველად კეტიმ ბიჭს ლოყა მიუშვირა, საკოცნელად, შემდეგ კი სახე შეატრიალა და კონკურსის მონაწილეს ტუჩებში აკოცა.

"კეტი, არა!" - იყვირა ბენჟამინმა.

კეტის კოცნა ვინმეს შეიძლება ძალიან გახარებოდა, მაგრამ ამერიკის ვარსკვლავის მონაწილე მათ შორის არაა.

"ეს ცოტა არ იყოს არაკომფორტული იყო, მინდოდა, რომ პირველი კოცნა განსაკუთრებული ყოფილიყო და ჩემს პირველ შეყვარებულთან განმეცადა. მას ჩემთვის რომ ეკითხა, მინდოდა თუ არა მისი კოცნა, უარს ვუპასუხებდი. ვიცი, ბევრი ბიჭი ეტყოდა მას "კი, სიამოვნებით", მაგრამ მე არა. იმ წამსვე არაკომფორტულად ვიგრძენი თავი, მინდოდა ჩემი პირველი კოცნა განსაკუთრებული ყოფილიყო" - უთხრა მან ნიუ-იორკ ტაიმსს.

ტვიტერის მომხმარებელმა კეტის ქმედება სექსუალურ შევიწროებად და არასასიამოვნოდ შეაფასეს, თუმცა ზოგმა ბენჯამინი იღბლიანადაც ჩათვალა.

"ეს იძულებითი სექსუალური ქმედება იყო. წარმოიდგინეთ, რომ ეს ჟიურის კაც წევრს გაეკეთებინა. ნუთუ კეტი პერიმ #metoo-ს კამპანიიდან ვერაფერი ისწავლა?"

"ეს არ იყო სწორი. ის მას მხოლოდ ლოყაზე კოცნაზე დათანხმდა. კეტიმ მისი საზღვრები დაარღვია. ბიჭები ისეთივე პატივისცემას იმსახურებენ, როგორსაც გოგოები. საჯარო ბოდიში აუცილებელია".

"იღბლიანი ბიჭია".

მოგვიანებით ბენჯამინმა ინსტაგრამზე განმარტა, რომ თავისი პოზიცია მედიამ კარგად არ გადმოსცა და თავს სექსუალურად შევიწროებულად არ თვლის.