ნიუ-იორკის პროკურორებმა ვაინშტაინის კომპანიის წინააღმდეგ სარჩელი შეიტანეს. ბრალდების მიხედვით, კომპანიამ თავისი თანამშრომლები ჰარვი ვაინშტაინისგან არ დაიცვა.

ჰოლივუდის ყოფილი პროდიუსერის მიმართ უამრავი ბრალდება არსებობს, მათ შორისაა სექსუალური შევიწროება, სექსუალური ძალადობა, გაუპატიურება და ა.შ. თავად ვაინშტაინი შეუთანხმებელ სექსობრივ აქტს უარყოფს.

ბრალდების თანახმად, ვაინშტაინი ძალადობდა ქალ თანამშრომლებზე და მათ მოკვლით ემუქრებოდა.

ვაინშტაინის ადვოკატი ამბობს, რომ გამოძიება უსამართლოდ მიმდინარეობს და უამრავი ბრალდება გამოგონილია. თავად კომპანია კომენტარისგან თავს იკავებს/

სარჩელი შეტანილია კომპანიის და მისი მფლობელების, ძმები ჰარვი და რობერტ ვაინშტაინის წინააღმდეგ. პროკურორები აცხადებენ, რომ რობერტ ვაინშტაინს ჰქონდა მტკიცებულებები იმის თაობაზე, რომ მისი ძმა თანამშრომელ ქალებზე ძალადობდა, თუმცა არაფერი მოიმოქმედა.

4-თვიანი გამოძიების შემდეგ, პროკურორები ვაინშტაინის წინააღმდეგ შემდეგ ბრალდებებს გამოჰყოფენ:

  • ვერბალური მუქარა, როგორიცაა "მოგკლავ", "შენი ოჯახის წევრებს მოვკლავ";
  • ქალი თანამშრომლების ვაინშტაინთან ერთად ღონისძიებებზე გაგზავნა, რათა მოგვიანებით მისი სექსუალური მოთხოვნილებები დაეკმაყოფილებინათ;
  • სექსუალური ხასიათის მოთხოვნები, კარიერის შენარჩუნების მიზნით;
  • მძღოლების დავალდებულება, მუდმივად ჰქონოდათ მანქანაში პრეზერვატივები და ნემსები ერექციისთვის;
  • ასისტენტებისთვის დავალება, რომ არასამუშაო საათებშიც გაეკონტროლებინათ თანამშრომლების სექსუალური აქტივობები და დაენიშნათ გრაფიკი;
  • ვაინშტაინის კომპანიის კონტრაქტში იყო პუნქტი, რომელიც დამსაქმებელს შეურაცხმყოფელ ბრალდებებზე ფინანსურ ვალდებულებებს აკისრებდა. ეს პუნქტი სექსუალურ ძალადობასაც ფარავდა.

ბრალდებების საპასუხოდ, ვაინშტაინის ადვოკატმა განაცხადა, რომ მისი კლიენტის ქმედებებში იყო შეცდომები, თუმცა არა კრიმინალური ქმედებები.

შეგახსენებთ, რომ ჰარვი ვაინშტაინის კომპანია გაკოტრდა და მხოლოდ $500 მილიონად იყიდება.